អូទ្រីសបានអំពាវនាវឱ្យសហភាពអឺរ៉ុប (EU) បង្កើនការត្រួតពិនិត្យលើកម្មវិធីផ្ញើសារ Telegram ដោយលើកឡើងថា វេទិកានេះកំពុងក្លាយជាកន្លែងសម្រាប់បណ្តាញជ្រុលនិយម និងយុទ្ធនាការផ្សព្វផ្សាយព័ត៌មានមិនពិត។
ប្រភពពីសារព័ត៌មានAnadolu Agency នៅថ្ងៃទី១៩ខែសីហា។
លោក Joerg Leichtfried រដ្ឋលេខាធិការអូទ្រីសទទួលបន្ទុកសន្តិសុខ និងស្ថាប័នស៊ើបការណ៍ បាននិយាយថា Telegram មិនគួរត្រូវបានលើកលែងពីច្បាប់របស់ EU ខណៈវេទិកាដែលមានទំហំប្រហាក់ប្រហែលគ្នាត្រូវគោរពតាមបទប្បញ្ញត្តិ និងតម្រូវការតឹងរ៉ឹងរួចហើយ។
អូទ្រីសចង់ឱ្យគណៈកម្មការអឺរ៉ុបចាត់ថ្នាក់ Telegram ជា “វេទិកាអនឡាញធំខ្លាំង” (Very Large Online Platform — VLOP) ក្រោមច្បាប់ Digital Services Act។ ការចាត់ថ្នាក់នេះនឹងធ្វើឱ្យ Telegram ត្រូវអនុវត្តកាតព្វកិច្ចតឹងរ៉ឹងជាងមុន ក្នុងការវាយតម្លៃ និងកាត់បន្ថយហានិភ័យចំពោះសិទ្ធិមូលដ្ឋាន និងសន្តិសុខសាធារណៈ។
បច្ចុប្បន្ន គណៈកម្មការអឺរ៉ុបកំពុងពិនិត្យចំនួនអ្នកប្រើប្រាស់ Telegram នៅអឺរ៉ុប ដើម្បីកំណត់ថា តើកម្មវិធីនេះមានអ្នកប្រើប្រាស់ប្រចាំខែច្រើនជាង ៤៥ លាននាក់ ក្នុង EU ឬអត់។ ប្រសិនបើលើសកម្រិតនេះ Telegram អាចប្រឈមនឹងកាតព្វកិច្ចសុវត្ថិភាពអនឡាញដ៏តឹងរ៉ឹងបំផុតរបស់ EU៕
