រយៈពេល ១០ឆ្នាំក្រោយគ្រោះរញ្ជួយដីដ៏ធ្ងន់ធ្ងរដែលបានវាយប្រហារភាគកណ្តាលរបស់ប្រទេសអ៊ីតាលីលើទីក្រុងAmatrice នៅតែប្រឈមនឹងការលំបាកក្នុងការសាងសង់ និងស្តារទីក្រុងឡើងវិញ។
ប្រភពពីសារព័ត៌មានReuter នៅថ្ងៃទី២០ខែសីហា។
គ្រោះរញ្ជួយដីកាលពីថ្ងៃទី២៤ ខែសីហា ឆ្នាំ២០១៦ បានបំផ្លាញទីក្រុង និងភូមិជាច្រើន ហើយបានសម្លាប់មនុស្សសរុប ៣០៣នាក់ ក្នុងនោះ ២៣៧នាក់ស្លាប់នៅទីក្រុង Amatrice ដែលជាតំបន់រងគ្រោះខ្លាំងបំផុត។
លោក Giorgio Cortellesi ដែលបច្ចុប្បន្នជាអភិបាលក្រុង Amatrice បានចងចាំថា នៅយប់កើតហេតុ លោកបានប្រញាប់ទៅរកកូនប្រុសពីរនាក់ដែលកំពុងស្នាក់នៅជាមួយជីដូនជីតា។ នៅពេលទៅដល់ លោកបានឃើញផ្លូវ និងផ្ទះជាច្រើនកន្លែងបាក់រលំ ហើយបានឮសំឡេងកូនប្រុសម្នាក់ស្រែកសុំជំនួយពីក្រោមគំនរបាក់បែក។
បន្ទាប់ពីកូនៗរបស់លោកត្រូវបានជួយសង្គ្រោះ លោកបានប្តេជ្ញាថានឹងជួយស្តារទីក្រុង Amatrice ឡើងវិញ។ លោកបានក្លាយជាអភិបាលក្រុងនៅឆ្នាំ២០២១ ប៉ុន្តែការស្តារឡើងវិញនៅតែដំណើរការយឺត និងប្រឈមនឹងឧបសគ្គជាច្រើន។
រដ្ឋាភិបាលអ៊ីតាលីបានចំណាយថវិការាប់ពាន់លានអឺរ៉ូសម្រាប់ការសាងសង់ឡើងវិញ ប៉ុន្តែប្រជាជនមួយចំនួននៅតែមិនទាន់អាចត្រឡប់ទៅរស់នៅផ្ទះរបស់ខ្លួនបាន។ អ្នករស់នៅក្នុងតំបន់ក៏មានការព្រួយបារម្ភថា ការស្តារឡើងវិញដែលយឺតយ៉ាវអាចធ្វើឱ្យមនុស្សជំនាន់ថ្មីចាកចេញពីទីក្រុង ហើយធ្វើឱ្យសហគមន៍បាត់បង់ប្រជាជនកាន់តែច្រើន៕
