កាលពីថ្ងៃសៅរ៍ ទី២២ ខែសីហា អ៊ីរ៉ង់ បានថ្កោលទោសផែនការរបស់សហរដ្ឋអាមេរិកក្នុងការប្រកាសដាក់ទណ្ឌកម្មថ្មី ដែលអាចធ្វើឱ្យសេដ្ឋកិច្ចអ៊ីរ៉ង់រងសម្ពាធកាន់តែខ្លាំង និងប៉ះពាល់ដល់ដៃគូពាណិជ្ជកម្មសំខាន់ៗរបស់ប្រទេស រួមទាំងប្រទេសចិន។
ប្រភពពីសារព័ត៌មានCNA។
ស្ថានការណ៍រវាងអ៊ីរ៉ង់ និងសហរដ្ឋអាមេរិកនៅតែមានភាពតានតឹង បន្ទាប់ពីសង្គ្រាមអស់រយៈពេលជិត ៦ខែ ចាប់តាំងពីសហរដ្ឋអាមេរិក និងអ៊ីស្រាអែលបានបើកការវាយប្រហារតាមអាកាសលើអ៊ីរ៉ង់កាលពីថ្ងៃទី២៨ ខែកុម្ភៈ។ បច្ចុប្បន្ន ការបាញ់ប្រហាររវាងភាគីទាំងពីរបានផ្អាក ប៉ុន្តែមិនទាន់មានសញ្ញាច្បាស់លាស់នៃការចាប់ផ្តើមកិច្ចចរចាសន្តិភាពឡើយ។
ជាមួយគ្នានេះ ការដឹកជញ្ជូនប្រេងតាមច្រកសមុទ្រ Hormuz បានធ្លាក់ចុះស្ទើរតែទាំងស្រុង ខណៈអ៊ីរ៉ង់បានព្រមានថា នឹងវាយប្រហារលើនាវាដឹកប្រេងដែលឆ្លងកាត់តំបន់នេះដោយគ្មានការអនុញ្ញាត។ សេដ្ឋកិច្ចអ៊ីរ៉ង់ក៏កំពុងប្រឈមនឹងសម្ពាធធ្ងន់ធ្ងរពីទណ្ឌកម្មដែលមានស្រាប់។
រដ្ឋមន្ត្រីក្រសួងរតនាគារអាមេរិក លោក Scott Bessent គ្រោងធ្វើសន្និសីទសារព័ត៌មាននៅថ្ងៃចន្ទ ទី២៤ ខែសីហា ដើម្បីប្រកាសអំពីវិធានការទណ្ឌកម្មថ្មី ខណៈលោកបានព្រមានថា វានឹងក្លាយជាទណ្ឌកម្មដែល “តឹងរ៉ឹងបំផុតក្នុងប្រវត្តិសាស្ត្រ” ប្រឆាំងនឹងអ៊ីរ៉ង់៕
