នៅថ្ងៃទី២៤ ខែសីហា ឆ្នាំ២០២៦ កងទ័ពយេម៉ែនបានអះអាងកាលពីថ្ងៃអាទិត្យថា ខ្លួនបានប្រើដ្រូនវាយប្រហារទីតាំងរបស់ក្រុមហ៊ូទីនៅតាមខ្សែប្រយុទ្ធជាច្រើន ខណៈការប្រយុទ្ធរវាងភាគីទាំងពីរកំពុងកើនឡើង។
ប្រភពពីសារព័ត៌មានAnadolu Agency។
តាមគេហទំព័រផ្លូវការរបស់កងទ័ពយេម៉ែន ដ្រូនយោធាបានវាយប្រហារកន្លែងប្រមូលផ្តុំ ការធ្វើចលនា និងបន្ទាយរបស់ក្រុមហ៊ូទី។ កងទ័ពក៏បានផ្សព្វផ្សាយវីដេអូដែលខ្លួនអះអាងថា បង្ហាញពីការវាយប្រហារ ប៉ុន្តែមិនបានបញ្ជាក់ទីតាំងជាក់លាក់នៃការវាយប្រហារឡើយ។
កងទ័ពមិនបានផ្តល់ព័ត៌មានអំពីចំនួនអ្នកស្លាប់ របួស ឬការខូចខាតនោះទេ ខណៈក្រុមហ៊ូទីមិនទាន់មានប្រតិកម្មភ្លាមៗចំពោះការអះអាងនេះ។
ការប្រកាសនេះកើតឡើងចំពេលការប្រយុទ្ធបានកើនឡើងក្នុងរយៈពេល ២៤ ម៉ោងចុងក្រោយ ដែលបណ្តាលឱ្យមនុស្សជាច្រើនស្លាប់ និងរងរបួស រួមទាំងជនស៊ីវិល។
សូមបញ្ជាក់ថា៖ ប្រទេសយេម៉ែនបានជាប់ក្នុងជម្លោះចាប់តាំងពីក្រុមហ៊ូទីកាន់កាប់រដ្ឋធានី Sanaa និងខេត្តមួយចំនួនក្នុងឆ្នាំ២០១៤។ បន្ទាប់មក ក្រុមចម្រុះដឹកនាំដោយអារ៉ាប៊ីសាអូឌីតបានចូលធ្វើអន្តរាគមន៍នៅខែមីនា ឆ្នាំ២០១៥ ដើម្បីគាំទ្ររដ្ឋាភិបាលយេម៉ែនដែលទទួលស្គាល់ជាអន្តរជាតិ៕
