នៅថ្ងៃទី២៤ ខែសីហា ឆ្នាំ២០២៦ កងទ័ពអ៊ីស្រាអែលបានប្រើប្រាស់គ្រាប់រំសេវក្នុងរយៈពេលមិនដល់ ៣ ឆ្នាំ ស្មើនឹងបរិមាណដែលខ្លួនធ្លាប់ប្រើក្នុងរយៈពេល ៣០ ឆ្នាំមុន។
ប្រភពពីសារព័ត៌មានAnadolu Agency។
របាយការណ៍បានឱ្យដឹងថា សង្គ្រាមដែលអូសបន្លាយបានធ្វើឱ្យកងទ័ពអ៊ីស្រាអែលរងសម្ពាធខ្លាំង ទាំងផ្នែកកងកម្លាំងមនុស្ស សម្ភារៈយោធា និងថវិកា។ យន្តហោះចម្បាំងត្រូវបានប្រើប្រាស់យ៉ាងខ្លាំង ខណៈរថក្រោះ និងរថពាសដែកក៏ត្រូវការជួសជុល និងប្តូរម៉ាស៊ីនជាច្រើន។
តាមកាសែតរបស់អ៊ីស្រាអែលMaariv កងទ័ពអ៊ីស្រាអែលបានបាត់បង់បុគ្គលិក ១,១៣៨ នាក់ ខណៈ ១១,៧៣០ នាក់ទៀតបានរងរបួសផ្លូវកាយ ឬផ្លូវចិត្ត។ ចំនួនអ្នកមានបញ្ហាផ្លូវចិត្តអាចនឹងកើនឡើងបន្ថែមទៀតនៅពេលក្រោយ។
បច្ចុប្បន្ន អ៊ីស្រាអែលកំពុងរក្សាកងទ័ពបម្រុងប្រមាណ ៥៣,០០០ នាក់ឱ្យបំពេញភារកិច្ចជារៀងរាល់ថ្ងៃ។ ការចំណាយលើកងទ័ពបម្រុងតែមួយខែកាលពីឆ្នាំមុន មានប្រមាណ ៧០៣ លានដុល្លារ។
កាសែតរបស់អ៊ីស្រាអែលMaariv បានព្រមានថា ប្រសិនបើសង្គ្រាម និងការដាក់ពង្រាយកងទ័ពនៅតែបន្តក្នុងទំហំធំបែបនេះ អ៊ីស្រាអែលអាចត្រូវកាត់បន្ថយប្រតិបត្តិការយោធា ដើម្បីសន្សំថវិកា និងកុំឱ្យកម្លាំងទាហានរងការអស់កម្លាំងខ្លាំងពេក៕
