កាលពីថ្ងៃទី២៣ ខែសីហា ឆ្នាំ២០២៦ អាជ្ញាធរទុយនីស៊ីបានរកឃើញសាកសពជនចំណាកស្រុក៨នាក់ បន្ទាប់ពីទូកមួយគ្រឿងដែលដឹកជនជាតិទុយនីស៊ី១៥នាក់ បានក្រឡាប់លិចនៅតំបន់សមុទ្រក្បែរទីក្រុង Ben Gardane ភាគអាគ្នេយ៍នៃប្រទេស។
ប្រភពពីសារព័ត៌មានAnadolu Agency។
អ្នកនាំពាក្យកងឆ្មាំជាតិទុយនីស៊ី លោក Houssem Eddine Jebabli បានប្រាប់ទីភ្នាក់ងារព័ត៌មានរដ្ឋ TAP ថា ប្រតិបត្តិការស្វែងរក និងជួយសង្គ្រោះកំពុងបន្ត ដើម្បីស្វែងរកអ្នកដែលនៅបាត់ខ្លួន។
អាជ្ញាធរបានរកឃើញសាកសព ៣នាក់កាលពីថ្ងៃសៅរ៍ និង ៥នាក់ទៀតកាលពីថ្ងៃអាទិត្យ។ បច្ចុប្បន្ន សាកសពសរុប ៨នាក់ត្រូវបានរកឃើញ ខណៈការស្វែងរកអ្នកដែលនៅសល់កំពុងបន្ត។
កងឆ្មាំសមុទ្រ កងការពារស៊ីវិល កងទ័ពជើងទឹក និងអង្គភាពគយតាមសមុទ្រ បានចូលរួមក្នុងប្រតិបត្តិការនេះ ព្រមទាំងមានឧទ្ធម្ភាគចក្រ ២គ្រឿងរបស់កងឆ្មាំជាតិ និងកងទ័ពជួយស្វែងរកផងដែរ។
ទុយនីស៊ីជាចំណុចចេញដំណើរសំខាន់មួយសម្រាប់ជនចំណាកស្រុកដែលព្យាយាមឆ្លងសមុទ្រមេឌីទែរ៉ាណេទៅកាន់អឺរ៉ុប។ ទោះជាយ៉ាងណា ការប៉ុនប៉ងធ្វើចំណាកស្រុកបានថយចុះយ៉ាងខ្លាំងក្នុងរយៈពេល ២ឆ្នាំចុងក្រោយ ដោយសារអាជ្ញាធរទុយនីស៊ីបានបង្កើនការបង្ក្រាប និងរឹតបន្តឹងការត្រួតពិនិត្យតាមព្រំដែនសមុទ្រ៕
