នៅថ្ងៃទី២ ខែកញ្ញា ឆ្នាំ២០២៦ គ្រួសារជាច្រើននៅនេប៉ាល់ ធ្វើពិធីបុណ្យសពទោះបីសាកសពសាច់ញាតិមិនទាន់រកឃើញបន្ទាប់ពីទឹកជំនន់ភ្លាមៗដ៏ធ្ងន់ធ្ងរ បានវាយប្រហារតំបន់ភ្នំហិមាល័យកាលពីថ្ងៃទី២៦ ខែសីហា។
ប្រភពពីសារព័ត៌មានAFP។
គ្រោះមហន្តរាយនេះត្រូវបានបង្កឡើងដោយការបាក់រលំផ្ទាំងទឹកកកនៅតំបន់ព្រំដែនចិន-នេប៉ាល់ បណ្តាលឱ្យទឹកកក ថ្ម និងកម្ទេចកម្ទីហូរយ៉ាងខ្លាំងចុះមក បំផ្លាញភូមិ និងផ្ទះប្រជាពលរដ្ឋ។ អាជ្ញាធរបានរាយការណ៍ថា មនុស្សជាង ១,១០០នាក់បានស្លាប់ ខណៈជិត ៤,៥០០នាក់ទៀតកំពុងបាត់ខ្លួន។
តំបន់ Rasuwa ដែលមានទីតាំងនៅតំបន់ខ្ពង់រាប ត្រូវបានគេចាត់ទុកថាជាតំបន់រងគ្រោះធ្ងន់ធ្ងរបំផុត។ ក្រុមសង្គ្រោះនៅតែបន្តស្វែងរកអ្នកនៅរស់ និងអ្នកបាត់ខ្លួន ដោយជីកកកាយកម្ទេចកម្ទី និងភក់ដែលបានកប់ផ្លូវរូងក្រោមដីរបស់រោងចក្រវារីអគ្គិសនី។
នៅរដ្ឋធានីកាត្មាន់ដូ មនុស្សរាប់រយនាក់បានទៅផ្តល់សំណាក DNA ដើម្បីជួយកំណត់អត្តសញ្ញាណសាកសពដែលរកឃើញ។ ដោយសារបន្ទប់រក្សាសាកសពមានចំនួនលើសសមត្ថភាព អាជ្ញាធរត្រូវបញ្ចុះសពមួយចំនួនដែលមិនទាន់អាចកំណត់អត្តសញ្ញាណបាន។
សម្រាប់គ្រួសារមួយចំនួនដែលបាត់បង់ក្តីសង្ឃឹម ពួកគេបានធ្វើពិធីបុណ្យតាមប្រពៃណីហិណ្ឌូ ដោយដុតរូបតំណាងធ្វើពីចំបើងជំនួសសាកសព។ ទោះជាយ៉ាងណា រដ្ឋមន្ត្រីការបរទេសនេប៉ាល់ លោក Shisir Khanal បានបញ្ជាក់ថា ក្តីសង្ឃឹមនៅតែមានថា អ្នកបាត់ខ្លួនមួយចំនួនអាចនៅរស់រានមានជីវិត៕
