ទីភ្នាក់ងារព័ត៌មានជាតិផ្លូវការរបស់លីបង់ បានរាយការណ៍អំពីការផ្ទុះជាង ៣០លើកនៅក្នុងទីក្រុង Al-Mansouri ភាគខាងត្បូងប្រទេសលីបង់ ខណៈដែលការវាយប្រហាររបស់អ៊ីស្រាអែល បានកំណត់គោលដៅលើផ្ទះសម្បែង និងហេដ្ឋារចនាសម្ព័ន្ធនៅក្នុងតំបន់នោះ។
យោងតាមតួលេខរបស់លីបង់ អ៊ីស្រាអែល បានសម្លាប់មនុស្សជិត ៤,៤០០នាក់ និងធ្វើឱ្យមនុស្ស ១២,៥០០នាក់ផ្សេងទៀតរងរបួសនៅក្នុងប្រទេសលីបង់ ចាប់តាំងពីជម្លោះដែលកើតឡើង កាលពីថ្ងៃទី២ ខែមីនា ឆ្នាំ២០២៦។
សារព័ត៌មានTRT នៅថ្ងៃទី១៣.០៩.២០២៦។
ផ្ទះមួយចំនួនត្រូវបានបំផ្លាញ ហើយយន្តហោះគ្មានមនុស្សបើក(drone) របស់អ៊ីស្រាអែល បានទម្លាក់ធុងផ្ទុកសារធាតុផ្ទុះខ្លាំង មកលើទីក្រុងនេះ ដែលក៏បានរងការវាយប្រហារដោយកាំភ្លើងធំផងដែរ។
នៅតំបន់ផ្សេងទៀត នៃភាគខាងត្បូងប្រទេសលីបង់ ដែលស្ថិតនៅជិតព្រំដែនជាមួយអ៊ីស្រាអែល យន្តហោះចម្បាំងរបស់អ៊ីស្រាអែលបានវាយប្រហារតំបន់នានាក្នុងស្រុក Tyre, Nabatieh, Bint Jbeil និង Marjayoun ខណៈដែលកងកម្លាំងអ៊ីស្រាអែលបានធ្វើការផ្ទុះ និងការវាយប្រហារដោយកាំភ្លើងធំ។
នៅតំបន់ Khiyam ការផ្ទុះដ៏ខ្លាំងមួយបានធ្វើឱ្យបែកបង្អួចផ្ទះនៅក្នុងទីក្រុងក្បែរនោះ។
ខណៈដែលយន្តហោះគ្មានមនុស្សបើកបានទម្លាក់សារធាតុផ្ទុះលើផ្ទះសម្បែង ដែលបង្កឱ្យមានអគ្គិភ័យឆេះឡើង។
ទីភ្នាក់ងារនេះបានរាយការណ៍ថា មិនមានអ្នករងរបួស ឬស្លាប់នៅក្នុងការវាយប្រហារកាលពីថ្ងៃសៅរ៍នោះទេ។
ការវាយប្រហារទាំងនេះ បានកើតឡើងបន្ទាប់ពីការវាយប្រហារ ការបាញ់ផ្លោង និងការផ្ទុះជាបន្តបន្ទាប់របស់អ៊ីស្រាអែលនៅភាគខាងត្បូងប្រទេសលីបង់កាលពីថ្ងៃសុក្រ ដែលបានកំណត់គោលដៅលើតំបន់លំនៅដ្ឋាន ផ្ទះសម្បែង សាលារៀន និងហេដ្ឋារចនាសម្ព័ន្ធ៕
