អ៊ីស្រាអែលបានបង្កើនការត្រៀមខ្លួនរបស់កងទ័ពជើងទឹក ដោយសារព្រួយបារម្ភថា ក្រុមហ៊ូទីនៅយេម៉ែនកំពុងពង្រីកការគ្រប់គ្រងតំបន់ឆ្នេរសមុទ្រក្រហម និងតំបន់ជិតច្រកសមុទ្រ Bab el-Mandeb ដែលជាផ្លូវទឹកសំខាន់សម្រាប់ការដឹកជញ្ជូនពាណិជ្ជកម្ម។
ប្រភពពីសារព័ត៌មានAl Jazeera នៅថ្ងៃទី១៤ខែកញ្ញា។
តាមសារព័ត៌មានអ៊ីស្រាអែល Yedioth Ahronoth កងកម្លាំងសន្តិសុខអ៊ីស្រាអែលកំពុងតាមដានយ៉ាងជិតស្និទ្ធ បន្ទាប់ពីកងកម្លាំងរដ្ឋាភិបាលយេម៉ែនបានដកចេញពីកោះ Perim (Mayyun) ដែលស្ថិតនៅច្រកចូល Bab el-Mandeb។ ការដកខ្លួននេះត្រូវបានគេវាយតម្លៃថា អាចធ្វើឱ្យហ៊ូទីមានសមត្ថភាពកាន់តែខ្លាំងក្នុងការគ្រប់គ្រង និងរំខានដល់ចរាចរណ៍នាវា។
អ៊ីស្រាអែលព្រួយបារម្ភថា ហ៊ូទីអាចប្រើ មីស៊ីល និងទូកផ្ទុកគ្រឿងផ្ទុះ ដើម្បីវាយប្រហារនាវាពាណិជ្ជកម្មដែលឆ្លងកាត់ច្រកនេះ។ ដូច្នេះ មេបញ្ជាការកងទ័ពជើងទឹកអ៊ីស្រាអែល លោក Eyal Harel បានបញ្ជាឱ្យបង្កើនកម្រិតត្រៀមខ្លួនរបស់កងទ័ពជើងទឹក និងមជ្ឈមណ្ឌលបញ្ជាការ ព្រមទាំងដាក់កម្លាំងបន្ថែមនៅសមុទ្រ។
អ៊ីស្រាអែលក៏បារម្ភថា ប្រសិនបើហ៊ូទីមានឥទ្ធិពលខ្លាំងនៅ Bab el-Mandeb ស្របពេលអ៊ីរ៉ង់មានឥទ្ធិពលនៅច្រក Hormuz នោះអាចធ្វើឱ្យអ៊ីរ៉ង់មានឥទ្ធិពលកាន់តែខ្លាំងលើផ្លូវដឹកជញ្ជូនតាមសមុទ្រសំខាន់ៗក្នុងតំបន់។
បច្ចុប្បន្នប្រហែល ៩៨% នៃទំនិញនាំចូលរបស់អ៊ីស្រាអែលមកតាមសមុទ្រ ដូច្នេះការរំខានដល់ផ្លូវទឹកទាំងនេះអាចប៉ះពាល់ដល់សេដ្ឋកិច្ច និងការផ្គត់ផ្គង់របស់ប្រទេស៕
