ប្រជាជនប៉ាឡេស្ទីន កំពុងរៀបចំពិធីបញ្ចុះសពជនរងគ្រោះចំនួន១០៥នាក់ ដែលស្លាប់ នៅក្នុងការវាយប្រហារដ៏ធ្ងន់ធ្ងររបស់អ៊ីស្រាអែល លើទីក្រុងហ្គាហ្សា (Gaza City) កាលពីខែតុលា ឆ្នាំ២០២៣។
សារព័ត៌មានAl Jazeera នៅថ្ងៃទី០១.១០.២០២៦។
ជនរងគ្រោះទាំងនោះ បានស្លាប់នៅក្នុងការវាយប្រហារតាមអាកាសជាបន្តបន្ទាប់របស់អ៊ីស្រាអែល ដោយប្រើប្រាស់គ្រាប់បែកយ៉ាងហោចណាស់ ២០គ្រាប់ ដែលបានកម្ទេចអគារAl Taj 3 កម្ពស់៧ជាន់ និងបំផ្លាញអគារលំនៅដ្ឋានជាច្រើនទៀតនៅក្នុងតំបន់ Yarmouk Square នៅរសៀលថ្ងៃទី២៥ ខែតុលា ឆ្នាំ២០២៣។
អគ្គនាយកដ្ឋានការពារស៊ីវិល បានឱ្យដឹងថា ហឹបសពដែលមានផ្ទុកអដ្ឋិធាតុរបស់ជនរងគ្រោះនឹងត្រូវដង្ហែក្នុងក្បួនពិធីបុណ្យសព ដោយមានការចូលរួមពីសមាជិកគ្រួសារ នៅថ្ងៃព្រហស្បតិ៍។
អដ្ឋិធាតុទាំងនោះនឹងត្រូវបញ្ចុះនៅក្នុងទីបញ្ចុះសព Sheikh Radwan ដែលស្ថិតនៅភាគពាយព្យនៃទីក្រុងហ្គាហ្សា។
អាជ្ញាធរការពារស៊ីវិល ហ្គាហ្សាបានបញ្ជាក់ថា ប្រតិបត្តិការស្វែងរក និងប្រមូលអដ្ឋិធាតុនេះ ត្រូវបានធ្វើឡើងដោយមានការសម្របសម្រួលជាមួយគណៈកម្មាធិការមួយរបស់ប្រទេសអេហ្ស៊ីប៕
