(ភ្នំពេញ)៖ តារាចម្រៀងរ៉េបដ៏ល្បីល្បាញរបស់កម្ពុជា គឺលោក វណ្ណដា (VannDa) រួមជាមួយក្រុមការងារនៃផលិតកម្ម បារមី (Baramey Production) បានទទួលកិត្តិយសចូលរួមក្នុងពិធីទទួលបដិសណ្ឋារកិច្ចជាលក្ខណៈឯកជនជាមួយ លោក អេម៉ានុយអែល ម៉ាក្រុង (Emmanuel Macron) ប្រធានាធិបតីនៃសាធារណរដ្ឋបារាំង លោកជំទាវទីមួយ ប្រ៊ីហ្ស៊ីត ម៉ាក្រុង (Brigitte Macron) និងលោកស្រី កាតឺរីន ប៉េហ្គាដ (Catherine Pégard)ដើម្បីសន្ទនាផ្លាស់ប្តូរទស្សនៈស្តីពីការរីកលូតលាស់ប្រកបដោយសក្តានុពលនៃវិស័យតន្ត្រី សិល្បៈ និងវប្បធម៌នៅកម្ពុជា។
នេះបើយោងតាមការ បង្ហោះរបស់ផលិតកម្ម បារមី នៅលើបណ្តាញសង្គមផ្លូវការ នាព្រឹកថ្ងៃទី១៥ ខែវិច្ឆិកា ឆ្នាំ២០២៦។
ផលិតកម្ម បារមី លើកឡើងថា ជំនួបដ៏មានតម្លៃនារាត្រីកន្លងទៅ បានរំលឹកដល់ក្រុមការងារទាំងអស់ថា តន្ត្រីពិតជាគ្មានព្រំដែនឡើយ។
ផលិតកម្ម បានគូសបញ្ជាក់ថា រាប់ចាប់ពីជំហានដំបូងនៅកម្ពុជា ឈានទៅដល់ឆាកកីឡាអូឡាំពិកទីក្រុងប៉ារីស រហូតដល់ការវិលត្រឡប់មកកាន់មាតុភូមិវិញក្នុងកិច្ចប្រជុំកំពូលហ្វ្រង់កូហ្វូនីលើកទី២០ នាពេលនេះ។
គឺសុទ្ធសឹងតែបានបង្ហាញថា រឿងរ៉ាវ សំឡេង និងវប្បធម៌របស់កម្ពុជា នៅតែបន្តធ្វើដំណើរទៅកាន់ពិភពលោកដ៏ទូលំទូលាយ ដោយផ្សារភ្ជាប់ដួងចិត្តមនុស្សគ្រប់ជាតិសាសន៍ គ្រប់ភាសា និងគ្រប់ជំនាន់ឱ្យកាន់តែជិតស្និទ្ធនឹងគ្នា។
ក្នុងឱកាសនោះ ផលិតកម្ម បារមី ក៏បានថ្លែងអំណរគុណយ៉ាងជ្រាលជ្រៅចំពោះ ប្រធានាធិបតី Emmanuel Macron និងគណៈប្រតិភូ ស្ថានទូតបារាំងប្រចាំកម្ពុជា ព្រមទាំងវិទ្យាស្ថានបារាំងនៅកម្ពុជា (Institut français du Cambodge) ដែលបានអញ្ជើញ និងផ្តល់ឱកាសឱ្យក្រុមការងារបានចូលរួមចែករំលែកក្នុងរាត្រីដ៏មានតម្លៃ និងមិនអាចបំភ្លេចបាននេះ ព្រមទាំងបានជូនពរឱ្យដំណើរទស្សនកិច្ចផ្លូវរដ្ឋរបស់ប្រធានាធិបតីបារាំង លោកជំទាវទីមួយ និងគណៈប្រតិភូទាំងអស់ ប្រព្រឹត្តទៅដោយភាពរលូន និងពោរពេញដោយអនុស្សាវរីយ៍ល្អៗនៅកម្ពុជា៕
