កូរ៉េខាងត្បូង និងជប៉ុន បានរាយការណ៍ថា កូរ៉េខាងជើង បានបាញ់មីស៊ីលផ្លោងមួយគ្រាប់ឆ្ពោះទៅកាន់សមុទ្រ នៅឯឆ្នេរសមុទ្រភាគខាងកើតរបស់ខ្លួន នៅថ្ងៃសៅរ៍(ថ្ងៃទី៣ ខែតុលា)។
សារព័ត៌មានCNA។
យោធាកូរ៉េខាងត្បូង បានថ្លែងនៅក្នុងសេចក្តីថ្លែងការណ៍មួយថា មីស៊ីលនេះត្រូវបានបាញ់ចេញពីតំបន់ Wonsan នៅវេលាម៉ោងប្រហែល៦:៣០ ព្រឹកថ្ងៃសៅរ៍ (ម៉ោង ៥:៣០ព្រឹក ម៉ោងនៅសិង្ហបុរី) ហើយបានហោះក្នុងចម្ងាយជាង៧០០ គីឡូម៉ែត្រ។
សេចក្តីថ្លែងការណ៍ដដែលបានបន្ថែមថា ទីក្រុងសេអ៊ូល និងទីក្រុងវ៉ាស៊ីនតោន កំពុងធ្វើការវិភាគលើការសាកល្បងនេះដើម្បីស្វែងរកព័ត៌មានលម្អិត។
នៅក្នុងសេចក្តីថ្លែងការណ៍តាមអ៊ីមែលដែលដកស្រង់សម្តីក្រសួងការពារជាតិជប៉ុន ឆ្មាំសមុទ្រជប៉ុនបានឱ្យដឹងថា វត្ថុនោះអាចជាមីស៊ីលផ្លោង ហើយហាក់ដូចជាបានធ្លាក់ចុះមកវិញ ដោយបានព្រមានដល់នាវាឱ្យមានការប្រុងប្រយ័ត្ន។
យោធាកូរ៉េខាងត្បូង បញ្ជាក់ថា ខ្លួនបានបង្កើនការតាមដានលើរាល់ការសាកល្បងមីស៊ីលបន្ថែមទៀត ហើយនឹងចែករំលែកព័ត៌មានចារកម្មជាមួយសហរដ្ឋអាមេរិក និងជប៉ុន។
ការិយាល័យប្រធានាធិបតីកូរ៉េខាងត្បូងបានឱ្យដឹងនៅក្នុងសេចក្តីថ្លែងការណ៍មួយថា ក្រុមប្រឹក្សាសន្តិសុខជាតិបានបើកកិច្ចប្រជុំបន្ទាន់មួយកាលពីថ្ងៃសៅរ៍ ដើម្បីវាយតម្លៃស្ថានភាពបន្ទាប់ពីការបាញ់មីស៊ីលនេះ។
រហូតមកដល់ពេលនេះក្នុងឆ្នាំនេះ កូរ៉េខាងជើងបានធ្វើការសាកល្បងមីស៊ីលជាង ១០ លើកមកហើយ។
ជួនកាល ទីក្រុងព្យុងយ៉ាងបានអះអាងថា ខ្លួនកំពុងសាកល្បងប្រព័ន្ធអាវុធប្រភេទថ្មី។ ការសាកល្បងមួយចំនួនបានធ្វើឡើងបន្ទាប់ពីកូរ៉េខាងជើងបានធ្វើការតវ៉ាប្រឆាំងនឹងសមយុទ្ធយោធារួមគ្នារវាងទីក្រុងសេអ៊ូល និងទីក្រុងវ៉ាស៊ីនតោន។
ការបាញ់សាកល្បងនេះ បានធ្វើឡើងបន្ទាប់ពីលោកស្រី Kim Yo Jong ដែលជាប្អូនស្រីដ៏មានឥទ្ធិពលរបស់មេដឹកនាំ Kim Jong Un បានចេញសេចក្តីថ្លែងការណ៍មួយកាលពីថ្ងៃសុក្រ ដោយបដិសេធការទាមទាររបស់ទីក្រុងសេអ៊ូលឱ្យមានការសុំទោសចំពោះករណីដែលទីក្រុងសេអ៊ូលអះអាងថាជាមីនរបស់កូរ៉េខាងជើង ដែលបានបង្កឱ្យទាហានកូរ៉េខាងត្បូងរងរបួសធ្ងន់ធ្ងរនៅក្នុងតំបន់គ្មានយោធា (DMZ) ដែលជាតំបន់មានការការពារយ៉ាងតឹងរ៉ឹងបំផុតរវាងកូរ៉េទាំងពីរ៕
