គណៈកម្មការប្រឆាំងការតាំងទីលំនៅ និងជញ្ជាំងរបស់ប៉ាឡេស្ទីនបានរាយការណ៍ថា ចាប់ពីថ្ងៃទី៧ ខែតុលា ឆ្នាំ២០២៣ រហូតមកដល់ពេលនេះ កងទ័ពអ៊ីស្រាអែល និងអ្នកតាំងទីលំនៅអ៊ីស្រាអែលបានធ្វើការវាយប្រហារចំនួន 62,916លើក លើប្រជាជន ដីធ្លី និងទ្រព្យសម្បត្តិប៉ាឡេស្ទីននៅតំបន់ West Bank និង East Jerusalem។
ប្រភពពីសារព័ត៌មានAA news នៅថ្ងៃទី៥ខែតុលា។
ក្នុងចំណោមនេះ កងទ័ពអ៊ីស្រាអែលត្រូវបានរាយការណ៍ថា មានចំនួន 48,174លើក ខណៈអ្នកតាំងទីលំនៅមាន 14,742លើក។ តំបន់ Hebron មានការវាយប្រហារច្រើនជាងគេ ចំនួន 10,840លើក បន្ទាប់មក Ramallah និង Al-Bireh 10,594លើក និង Nablus 10,261លើក។
តាមរបាយការណ៍ ការវាយប្រហារទាំងនេះបានសម្លាប់ជនជាតិប៉ាឡេស្ទីន 66នាក់ និងមានការដុតបំផ្លាញដីធ្លី និងទ្រព្យសម្បត្តិចំនួន 1,182លើក។ ដើមឈើប្រមាណ 147,111ដើម ត្រូវបានកាប់ឬបំផ្លាញ ក្នុងនោះមានដើមអូលីវជាង 100,000ដើម។
អាជ្ញាធរអ៊ីស្រាអែលក៏ត្រូវបានរាយការណ៍ថា បានកម្ទេចសំណង់ចំនួន 5,059កន្លែង និងរឹបអូសដីប៉ាឡេស្ទីនប្រមាណ 64,200ដុនាំ។ របាយការណ៍ក៏និយាយថា មានគម្រោងសាងសង់តំបន់តាំងទីលំនៅអ៊ីស្រាអែលចំនួន 415គម្រោង កំពុងត្រូវបានជំរុញនៅ West Bank និង East Jerusalem។
គណៈកម្មការប៉ាឡេស្ទីនបានអំពាវនាវឱ្យសហគមន៍អន្តរជាតិចាត់វិធានការដើម្បីបញ្ឈប់ការពង្រីកតំបន់តាំងទីលំនៅ និងឱ្យអ្នកទទួលខុសត្រូវប្រឈមមុខនឹងច្បាប់៕
