មនុស្សយ៉ាងហោចណាស់២នាក់បានរងរបួស បន្ទាប់ពីគ្រោះរញ្ជួយដីកម្រិត៥.៧រ៉ិចទ័រ បានវាយប្រហារខេត្តគូម៉ាម៉ូតូ ភាគនិរតីប្រទេសជប៉ុន នៅវេលាម៉ោងប្រមាណ ២៖២២នាទីរំលងអធ្រាត្រ ថ្ងៃទី១៩ ខែវិច្ឆិកា ឆ្នាំ២០២៦។
សារព័ត៌មានAnadolu Agency។
យោងតាមទីភ្នាក់ងារឧតុនិយមជប៉ុន ការរញ្ជួយដីនេះមានជម្រៅប្រមាណ ១០គីឡូម៉ែត្រ ហើយអាចមានអារម្មណ៍រំញ័រនៅលើកោះគ្យូស៊ូ ក៏ដូចជាតំបន់មួយចំនួននៃកោះស៊ីកូគុ និងហុងស៊ូ។
អាជ្ញាធរបានអំពាវនាវឱ្យប្រជាពលរដ្ឋបន្តប្រុងប្រយ័ត្នចំពោះការរញ្ជួយដីដែលអាចកើតឡើងម្តងទៀតក្នុងកម្រិតប្រហាក់ប្រហែលគ្នា ក្នុងរយៈពេលប្រហែលមួយសប្តាហ៍ខាងមុខ។ ទោះជាយ៉ាងណា មិនមានការចេញសេចក្តីប្រកាសអាសន្នអំពីរលកយក្សស៊ូណាមិទេ។
ជាមួយគ្នានេះ អាជ្ញាធរមូលដ្ឋាននៅទីក្រុងមីណាម៉ាតា និងតំបន់គូម៉ា បានចេញបញ្ជាឱ្យប្រជាពលរដ្ឋជម្លៀសខ្លួនទៅកាន់ទីកន្លែងមានសុវត្ថិភាព។ រីឯរថភ្លើងល្បឿនលឿនយ៉ាងហោចណាស់ ៨ខ្សែ រវាងស្ថានីយ៍ហាកាតា និងកាហ្គោស៊ីម៉ា-ឈូអូ ត្រូវបានផ្អាកដំណើរការ ដែលប៉ះពាល់ដល់អ្នកដំណើរប្រមាណ ៥,៦០០នាក់៕

