នៅថ្ងៃទី១៩ ខែវិច្ឆិកា កងទ័ពរដ្ឋាភិបាលយេម៉ែនបានប្រកាស ថា ខ្លួនបានបើកការវាយប្រហារតាមអាកាស និងជើងគោកជាង៧០០លើកប្រឆាំងនឹងក្រុមឧទ្ទាមហ៊ូទីនៅតាមសមរភូមិជាច្រើន ដោយបណ្តាលឱ្យមេបញ្ជាការ និងអ្នកប្រយុទ្ធក្រុមហ៊ូទីចំនួន១៤២នាក់ស្លាប់និងរងរបួស។
សារព័ត៌មានAl Jazeera។
អ្នកនាំពាក្យកងទ័ពយេម៉ែន លោក Majed al-Nuzaili បានឱ្យដឹងថា ប្រតិបត្តិការនេះក៏បានបំផ្លាញ ឬធ្វើឱ្យខូចខាតរថយន្តយោធា និងសម្ភារៈយោធាចំនួន ៧២ គ្រឿងផងដែរ។ លោកបន្ថែមថា កងទ័ពបានទប់ស្កាត់ការវាយប្រហារ និងការប៉ុនប៉ងជ្រៀតចូលរបស់ក្រុមហ៊ូទីនៅខេត្ត Taiz ខណៈការប្រយុទ្ធនៅតែបន្តក្នុងតំបន់ Marib និង Al-Jawf។
ប្រតិបត្តិការនេះស្ថិតក្នុងយុទ្ធនាការមួយមានឈ្មោះថា «ព្រឹកព្រលឹមយេម៉ែន» (Dawn of Yemen) ដែលរដ្ឋាភិបាលបានចាប់ផ្តើមតាំងពីថ្ងៃទី៥ ខែតុលា ក្នុងគោលបំណងដណ្តើមយកការគ្រប់គ្រងស្ថាប័នរដ្ឋ និងដណ្តើមយករដ្ឋធានីសាណា (Sanaa) ពីក្រុមហ៊ូទីមកវិញ។
យោងតាមរបាយការណ៍របស់អង្គការសហប្រជាជាតិ ការប្រយុទ្ធរវាងកងកម្លាំងរដ្ឋាភិបាល និងក្រុមហ៊ូទី ដែលបានចាប់ផ្តើមឡើងវិញកាលពីខែកក្កដា បានបណ្តាលឱ្យមនុស្សរាប់ពាន់នាក់ស្លាប់ និងរងរបួស ព្រមទាំងធ្វើឱ្យប្រជាជនជាង ២៥០.០០០ នាក់ភៀសខ្លួនចេញពីលំនៅឋាន។
ការប៉ះទង្គិចជាថ្មីនេះបានបញ្ចប់ភាពស្ងប់ស្ងាត់មួយរយៈ ដែលមានតាំងពីខែមេសា ឆ្នាំ២០២២ និងធ្វើឱ្យវិបត្តិមនុស្សធម៌នៅប្រទេសយេម៉ែនកាន់តែធ្ងន់ធ្ងរឡើង៕

