អាល្លឺម៉ង់ បានសម្រេចដកខ្លួនចេញពីគម្រោងអភិវឌ្ឍរថក្រោះចម្បាំងជំនាន់ថ្មីរួមជាមួយប្រទេសបារាំង ដែលមានឈ្មោះថា Main Ground Combat System (MGCS)។ នេះបើយោងតាមការលើកឡើងរបស់មេបញ្ជាការកងកម្លាំងប្រដាប់អាវុធបារាំង លោកឧត្តមសេនីយ៍ Fabien Mandon កាលពីថ្ងៃទី៨ ខែតុលា ឆ្នាំ២០២៦។
ប្រភពពីសារព័ត៌មានAA news។
គម្រោងនេះបានចាប់ផ្តើមនៅឆ្នាំ២០១៧ ក្នុងគោលបំណងបង្កើតប្រព័ន្ធប្រយុទ្ធជើងគោកថ្មី ដើម្បីជំនួសរថក្រោះ Leclerc របស់បារាំង និងរថក្រោះ Leopard 2 របស់អាល្លឺម៉ង់។ ទោះជាយ៉ាងណា គម្រោងនេះបានជួបប្រទះការពន្យារពេល និងការខ្វែងគំនិតគ្នាលើការបែងចែកការងាររវាងក្រុមហ៊ុន ការផ្តល់ហិរញ្ញប្បទាន និងការជ្រើសរើសបច្ចេកវិទ្យា។
លោក Fabien Mandon បានបញ្ជាក់ថា ការដកខ្លួនរបស់អាល្លឺម៉ង់មិនមែនមានន័យថាកិច្ចខិតខំប្រឹងប្រែងទាំងមូលបរាជ័យនោះទេ ប៉ុន្តែវាជាការសម្រេចចិត្តដ៏សំខាន់មួយរបស់អាល្លឺម៉ង់។ លោកក៏បានសង្កត់ធ្ងន់ថា បារាំងនៅតែត្រូវការរថក្រោះធុនធ្ងន់សម្រាប់សមត្ថភាពការពារជាតិ។
មេបញ្ជាការរូបនេះបានឱ្យដឹងថា បារាំងនឹងចាប់ផ្តើមសិក្សារៀបចំនៅឆ្នាំ២០២៧ ដើម្បីត្រៀមដករថក្រោះ Leclerc ចេញពីការប្រើប្រាស់ជាបណ្តើរៗ ចាប់ពីឆ្នាំ២០៣៨។ បារាំងក៏កំពុងពិចារណាប្រើប្រាស់បច្ចេកវិទ្យាថ្មីៗ ដូចជា មនុស្សយន្ត បញ្ញាសិប្បនិម្មិត និងប្រព័ន្ធចែករំលែកទិន្នន័យ ដើម្បីបង្កើនសមត្ថភាពយោធា និងកាត់បន្ថយចំនួនកងកម្លាំងដែលត្រូវប្រើប្រាស់។
ការសម្រេចចិត្តនេះជាបញ្ហាប្រឈមថ្មីមួយសម្រាប់កិច្ចសហប្រតិបត្តិការការពារជាតិរវាងបារាំង និងអាល្លឺម៉ង់ បន្ទាប់ពីគម្រោងអភិវឌ្ឍយន្តហោះចម្បាំងជំនាន់ថ្មី Future Combat Air System ដែលមានការចូលរួមពីប្រទេសអេស្ប៉ាញផងដែរ បានបរាជ័យកាលពី៤ខែមុន៕
