ប្រធានាធិបតីអ៊ីរ៉ង់ លោក ម៉ាស៊ូដ ពេហ្សេស្កៀន បានឱ្យដឹងថា អ៊ីរ៉ង់និងសហរដ្ឋអាមេរិកបានផ្លាស់ប្តូរសំណើថ្មីៗគ្នា ដើម្បីស្វែងរកដំណោះស្រាយបញ្ចប់សង្គ្រាម និងបើកច្រកសមុទ្រហ័រមូសឡើងវិញ។ លោកបានថ្លែងដូច្នេះក្នុងជំនួបជាមួយប្រធានាធិបតីរុស្ស៊ី លោក វ្ល៉ាឌីមៀ ពូទីន នៅប្រទេសតួកមេនីស្ថាន កាលពីថ្ងៃទី៨ ខែតុលា ឆ្នាំ២០២៦។
ប្រភពពីសារព័ត៌មានAA news។
លោកពេហ្សេស្កៀនបានបញ្ជាក់ថា អ៊ីរ៉ង់មិនបោះបង់ការចរចាជាមួយសហរដ្ឋអាមេរិកឡើយ ទោះបីសង្គ្រាមនៅតែបន្តក៏ដោយ។ លោកបានលើកឡើងថា ភាគីទាំងពីរបានដាក់សំណើ និងកែសម្រួលសំណើរៀងៗខ្លួន ហើយគ្រោងជួបចរចាតាមរយៈអ្នកសម្របសម្រួល ដើម្បីស្វែងរកកិច្ចព្រមព្រៀងរួម។
ក្នុងជំនួបនេះ មេដឹកនាំទាំងពីរក៏បានពិភាក្សាអំពីការពង្រឹងកិច្ចសហប្រតិបត្តិការរវាងប្រទេសទាំងពីរ លើវិស័យថាមពល កសិកម្ម ដឹកជញ្ជូន និងពាណិជ្ជកម្ម ព្រមទាំងការជំរុញគម្រោងរួមឱ្យបានលឿន។
លោកពូទីនបានបង្ហាញពីការត្រៀមខ្លួនរបស់រុស្ស៊ីក្នុងការគាំទ្រកិច្ចខិតខំប្រឹងប្រែងការទូត ដើម្បីដោះស្រាយជម្លោះរវាងអ៊ីរ៉ង់ និងសហរដ្ឋអាមេរិក។ កន្លងមក លោកក៏បានព្រមានថា បទឈប់បាញ់រវាងភាគីទាំងពីរមានភាពផុយស្រួយ និងអាចបែកបាក់បានគ្រប់ពេល។
លោកពេហ្សេស្កៀនបានបញ្ជាក់បន្ថែមថា អ៊ីរ៉ង់ចង់បញ្ចប់សង្គ្រាម ប៉ុន្តែទាមទារឱ្យសិទ្ធិរបស់ប្រជាជនអ៊ីរ៉ង់ត្រូវបានគោរពតាមច្បាប់អន្តរជាតិ។
ជំនួបនេះធ្វើឡើងនៅក្រៅកិច្ចប្រជុំកំពូលមេដឹកនាំសហគមន៍រដ្ឋឯករាជ្យ (CIS) និងកិច្ចប្រជុំស្តីពីបរិស្ថានសមុទ្រកាសព្យែន ដែលផ្តោតលើកិច្ចសហប្រតិបត្តិការក្នុងតំបន់ និងបញ្ហាអន្តរជាតិ៕
