នៅថ្ងៃអង្គារ ទី១៣ ខែតុលា ឆ្នាំ២០២៦ ប្រាក់ដុល្លារអាមេរិកបានធ្លាក់ថ្លៃ បន្ទាប់ពីតម្លៃប្រេងធ្លាក់ចុះ និងអ្នកវិនិយោគរំពឹងថា ជម្លោះនៅមជ្ឈិមបូព៌ានឹងមិនរីករាលដាលកាន់តែខ្លាំងមុនការបោះឆ្នោតពាក់កណ្តាលអាណត្តិនៅសហរដ្ឋអាមេរិក។
ប្រភពពីសារព័ត៌មានReuter។
យោងតាមសារព័ត៌មាន Reuters សន្ទស្សន៍ប្រាក់ដុល្លារអាមេរិក ដែលវាស់កម្លាំងប្រាក់ដុល្លារធៀបនឹងរូបិយប័ណ្ណសំខាន់ៗចំនួន ៦ បានធ្លាក់ចុះ ០,៣០% មកនៅត្រឹម ១០២,២៦ បន្ទាប់ពីឡើងដល់កម្រិតខ្ពស់បំផុតចាប់តាំងពីខែមេសា ឆ្នាំ២០២៥ កាលពីថ្ងៃចន្ទ។ ចំណែកប្រាក់អឺរ៉ូ និងប្រាក់យេនជប៉ុនបានឡើងថ្លៃធៀបនឹងប្រាក់ដុល្លារ។
តម្លៃប្រេងក៏បានធ្លាក់ចុះផងដែរ ដោយអ្នកជួញដូរកំពុងពិចារណាអំពីលទ្ធភាពដែលការផ្គត់ផ្គង់ប្រេងម៉ាស៊ូតពីប្រទេសរុស្ស៊ីនឹងកើនឡើង។ ជាទូទៅ នៅពេលតម្លៃប្រេងឡើងថ្លៃ ប្រាក់ដុល្លារតែងតែទទួលបានការគាំទ្រ ខណៈរូបិយប័ណ្ណរបស់ប្រទេសដែលនាំចូលថាមពល ដូចជាប្រាក់អឺរ៉ូ និងប្រាក់យេន អាចរងសម្ពាធ។
អ្នកវិនិយោគក៏កំពុងរង់ចាំទិន្នន័យអតិផរណារបស់អាមេរិកសម្រាប់ខែកញ្ញា ដែលគ្រោងចេញផ្សាយនៅថ្ងៃពុធ ដើម្បីវាយតម្លៃថា តើធនាគារកណ្តាលអាមេរិកនឹងបន្តដំឡើងអត្រាការប្រាក់ ឬរក្សាអត្រាការប្រាក់ដដែល។
បច្ចុប្បន្ន ទីផ្សារហិរញ្ញវត្ថុរំពឹងថា ធនាគារកណ្តាលអាមេរិកនឹងរក្សាអត្រាការប្រាក់ដដែលក្នុងខែនេះ ដោយសារមន្ត្រីមួយចំនួនចង់រង់ចាំទិន្នន័យបន្ថែម មុនសម្រេចចិត្តលើវិធានការបន្ទាប់។
ស្ថានការណ៍នេះបង្ហាញថា តម្លៃប្រេង ភាពតានតឹងនយោបាយអន្តរជាតិ និងគោលនយោបាយអត្រាការប្រាក់របស់អាមេរិក កំពុងជះឥទ្ធិពលលើតម្លៃប្រាក់ដុល្លារ និងទីផ្សារហិរញ្ញវត្ថុពិភពលោក៕
