នៅថ្ងៃទី១៣ ខែតុលា ឆ្នាំ២០២៦ ប្រធានាធិបតីអាមេរិក លោក ដូណាល់ ត្រាំ បានជំរុញប្រធានាធិបតីរុស្ស៊ី លោក វ្ល៉ាឌីមៀរ ពូទីន និងប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី ឱ្យឈានដល់កិច្ចព្រមព្រៀង ដើម្បីបញ្ចប់សង្គ្រាមរវាងប្រទេសទាំងពីរ។ លោកត្រាំបានហៅសង្គ្រាមនេះថា ជាសង្គ្រាមគួរឱ្យអស់សំណើច និងមិនគួរបន្តទៀតឡើយ។
ប្រភពពីសារព័ត៌មានAA news។
លោកត្រាំបាននិយាយថា ក្នុងខែនេះ ភាគីទាំងពីរបានបាត់បង់មនុស្សសរុបប្រមាណ ៣២.០០០ នាក់ ដោយសារសង្គ្រាម។ លោកជឿថា មេដឹកនាំទាំងពីរចង់បញ្ចប់សង្គ្រាម ប៉ុន្តែមិនទាន់រកឃើញវិធីសាស្ត្រដើម្បីសម្រេចកិច្ចព្រមព្រៀងនៅឡើយ។
កាលពីថ្ងៃអាទិត្យ លោកត្រាំបានប្រកាសថា រុស្ស៊ី និងអ៊ុយក្រែនបានព្រមព្រៀងគ្នាលើបទឈប់បាញ់ភ្លាមៗ ដោយមិនវាយប្រហារលើហេដ្ឋារចនាសម្ព័ន្ធថាមពលរបស់គ្នាទៅវិញទៅមក។ ទោះជាយ៉ាងណា ការអះអាងនេះត្រូវបានជំទាស់ បន្ទាប់ពីភាគីទាំងពីរបានបង្ហាញការមិនយល់ស្របជាសាធារណៈចំពោះការអះអាងថា មានកិច្ចព្រមព្រៀងរួចហើយ។
លោកត្រាំក៏បានបញ្ចេញមតិថា លោកពូទីនហាក់មានបំណងចង់ឈានដល់កិច្ចព្រមព្រៀងជាងលោកហ្សេលេនស្គី។ លោកបន្ថែមថា ការស្អប់ខ្ពើមរវាងមេដឹកនាំទាំងពីរធ្វើឱ្យការចរចាបញ្ចប់សង្គ្រាមមានភាពលំបាក។
ទោះបីជាលោកត្រាំបង្ហាញក្តីសង្ឃឹមថា ភាគីទាំងពីរនឹងអាចព្រមព្រៀងគ្នាក៏ដោយ ក៏មិនទាន់មានការបញ្ជាក់ច្បាស់លាស់ពីរុស្ស៊ី និងអ៊ុយក្រែនថា កិច្ចព្រមព្រៀងបញ្ចប់សង្គ្រាមត្រូវបានសម្រេចរួចហើយនោះទេ៕
