កាសែត The Wall Street Journal បានរាយការណ៍កាលពីថ្ងៃពុធទី១៤.១០.២០២៦ ដោយដកស្រង់សម្តីមន្ត្រីអាមេរិក និងបុគ្គលផ្សេងទៀតដែលដឹងរឿងនេះថា រដ្ឋបាលរបស់លោក ដូណាល់ ត្រាំ កំពុងធ្វើការស៊ើបអង្កេតលើសមាជិកសភាមកពីគណបក្សប្រជាធិបតេយ្យ គឺអ្នកស្រី Ilhan Omar(តំណាងរដ្ឋ Minnesota)ដោយមានគោលបំណងរៀបចំសំណុំរឿង ដើម្បីដកហូតសញ្ជាតិអាមេរិករបស់អ្នកស្រី និងឈានទៅដល់ការបណ្តេញចេញពីសហរដ្ឋអាមេរិក។
សារព័ត៌មានAnadolu។
ការស៊ើបអង្កេតកំពុងពិនិត្យ មើលពីរបៀបដែលអ្នកស្រី Omar ទទួលបានសញ្ជាតិអាមេរិក។
បន្ទាប់ពីបានមកដល់សហរដ្ឋអាមេរិកពីប្រទេសសូម៉ាលីកាលពីប៉ុន្មានទសវត្សរ៍មុន។
ព្រមទាំងសកម្មភាពនានាដែលពាក់ព័ន្ធនឹងឪពុករបស់អ្នកស្រីដែលបានទទួលមរណភាពទៅហើយ គឺលោក Nur Omar Mohamed។
កាសែតនេះ បានរាយការណ៍ថា លោក Mohamed បាននាំអ្នកស្រី Omar និងសមាជិកគ្រួសារផ្សេងទៀតមកកាន់សហរដ្ឋអាមេរិក ពីជំរុំជនភៀសខ្លួនមួយក្នុងប្រទេសកេនយ៉ា កាលពីឆ្នាំ ១៩៩៥។
ប្រភពដែលដឹងពីបញ្ហានេះបានឱ្យដឹងថា ការស៊ើបអង្កេតនេះកំពុងដំណើរការលើទិដ្ឋភាពជាច្រើន ដោយអាជ្ញាធរកំពុងពិនិត្យមើលប្រវត្តិអន្តោប្រវេសន៍ និងឯកសារគ្រួសាររបស់សមាជិកសភារូបនេះ។
ភ្នាក់ងារសហព័ន្ធបានឆែកឆេរផ្ទះរបស់អ្នកស្រី Omar ក្នុងទីក្រុងវ៉ាស៊ីនតោន ឌីស៊ី (Washington, D.C.)កាលពីព្រឹកថ្ងៃចន្ទ ពោលគឺប្រហែល ៣សប្តាហ៍មុនការបោះឆ្នោតពាក់កណ្តាលអាណត្តិ ដែលអ្នកស្រីកំពុងឈរឈ្មោះដើម្បីជាប់ឆ្នោតឡើងវិញ។
ក្រសួងយុត្តិធម៌បានបញ្ជាក់ថា សកម្មភាពអនុវត្តច្បាប់នេះ«គឺជាផ្នែកមួយនៃការស៊ើបអង្កេតព្រហ្មទណ្ឌកម្រិតសហព័ន្ធដែលកំពុងបន្តធ្វើឡើង»។
ប្រភពដែលដឹងពីការឆែកឆេរនេះបានឱ្យដឹងថា អ្នកស៊ើបអង្កេតបានរឹបអូសវត្ថុមួយចំនួនពីលំនៅឋាននោះ រួមមាន ទូរសព្ទដៃ សៀវភៅកត់ត្រា កុំព្យូទ័រផ្ទាល់ខ្លួន និងលិខិតឆ្លងដែនរបស់អ្នកស្រី Omar។
កាសែត The Wall Street Journal បានរាយការណ៍ថា នៅពេលនោះ មានតែអ្នកស្រី Omar និងស្វាមីប៉ុណ្ណោះដែលនៅក្នុងផ្ទះ។
ប្រភពមួយដែលដឹងពីដំណើរការនេះបានប្រាប់កាសែតខាងលើថា អាជ្ញាធរក៏បានចេញដីកាបង្គាប់ឱ្យចូលខ្លួន (subpoenas) ជាង១០ ច្បាប់ផងដែរ រួមទាំងទៅលើសាច់ញាតិមួយចំនួនរបស់អ្នកស្រី Omar ដើម្បីឱ្យចូលខ្លួនផ្តល់សក្ខីកម្មនៅចំពោះមុខគណៈវិនិច្ឆ័យធំ (grand jury) របស់សហព័ន្ធនៅក្នុងរដ្ឋ Minnesota។
អ្នកស្រី Omar បានរិះគន់ការឆែកឆេររបស់អាជ្ញាធរសហព័ន្ធនៅផ្ទះរបស់អ្នកស្រីកាលពីថ្ងៃចន្ទ ដោយចាត់ទុកប្រតិបត្តិការនេះថាជាការប៉ុនប៉ងរបស់រដ្ឋបាលលោក ត្រាំ ក្នុងការគំរាមកំហែងគូប្រជែងនយោបាយ។
អ្នកស្រីបានសរសេរនៅលើបណ្តាញសង្គម Xថា៖ «សូមកុំយល់ច្រឡំ៖ នេះគឺជាការប៉ុនប៉ងកំណត់គោលដៅ លើសត្រូវនយោបាយ និងប្រើប្រាស់ការអនុវត្តច្បាប់សហព័ន្ធជាអាវុធ»៕
