យោងតាមមន្ត្រីអាមេរិកជាច្រើនរូប ដែលដឹងពីបញ្ហានេះ បានឱ្យដឹងថា យោធាអាមេរិក បានរៀបចំផែនការវាយប្រហារថ្មីៗ។
ដែលរួមបញ្ចូលទាំងលទ្ធភាពនៃការប្រើប្រាស់អ្វីដែលគេហៅថា «មាតានៃគ្រាប់បែកទាំងឡាយ»(Mother of All Bombs) ដើម្បីកំណត់គោលដៅលើហេដ្ឋារចនាសម្ព័ន្ធថាមពល និងទីតាំងនុយក្លេអ៊ែររបស់អ៊ីរ៉ង់។
ប្រសិនបើប្រធានាធិបតី ដូណាល់ ត្រាំ (Donald Trump) ចេញបញ្ជាឱ្យបន្តប្រតិបត្តិការប្រយុទ្ធឡើងវិញ មិនថាមុន ឬក្រោយការបោះឆ្នោតពាក់កណ្តាលអាណត្តិនោះទេ។
សារព័ត៌មានCNN នៅថ្ងៃទី១៥.១០.២០២៦។
ប្រភពជាច្រើនដែលដឹងអំពីការពិភាក្សាផែនការយោធាផ្ទៃក្នុងស្តីពីលទ្ធភាពនៃការដាក់ពង្រាយអាវុធនេះ បានលើកឡើងថា ការប្រើប្រាស់គ្រាប់បែក GBU-43/B Massive Ordnance Air Blast Bomb ឬហៅកាត់ថា MOAB ដែលជាគ្រាប់បែកមិនមែននុយក្លេអ៊ែរធំជាងគេបំផុតនៅក្នុងឃ្លាំងអាវុធរបស់សហរដ្ឋអាមេរិក នៅក្នុងជម្លោះជាមួយអ៊ីរ៉ង់ជាលើកដំបូងនោះ នឹងបង្ហាញពីការកើនឡើងនៃភាពតានតឹងយ៉ាងខ្លាំង។
ទោះជាយ៉ាងណាក៏ដោយ ក៏មានមន្ទិលសង្ស័យថា តើវានឹងមានប្រសិទ្ធភាពកម្រិតណា ក្នុងការសម្រេចគោលដៅយុទ្ធសាស្ត្រដែលលោក ត្រាំ បានដាក់ចេញ ឬក្នុងការផ្លាស់ប្តូរតុល្យភាពនៃសង្គ្រាមនេះ។
អស់រយៈពេលជាច្រើនខែមកហើយ លោក ត្រាំ និងទីប្រឹក្សារបស់លោក បានពិភាក្សាអំពីជម្រើសនានាដែលអាចចាត់ទុកថាជាការបញ្ចប់សង្គ្រាម «ជាស្ថាពរ»(យ៉ាងហោចណាស់ក៏ក្នុងន័យនៃការបង្កើតសារនយោបាយដែរ) ដោយពួកគេដឹងច្បាស់ថា ជម្លោះនេះបានក្លាយជារឿងដែលប្រជាជនអាមេរិកមិនពេញចិត្ត៕
