ប្រធានាធិបតីសហរដ្ឋអាមេរិក លោក ដូណាល់ ត្រាំ បានថ្លែងកាលពីយប់ថ្ងៃពុធទី១៤.១០.២០២៦ថា សង្គ្រាមជាមួយអ៊ីរ៉ង់នឹងបញ្ចប់«ក្នុងពេលឆាប់ៗនេះ» ដោយលោកបានព្យាករណ៍ថា តម្លៃប្រេងនឹងធ្លាក់ចុះយ៉ាងខ្លាំង នៅពេលដែលជម្លោះនេះបញ្ចប់ទៅ។
សារព័ត៌មានAnadolu។
លោក ត្រាំ បានប្រាប់អ្នកសារព័ត៌មាននៅក្នុងរដ្ឋ Montana ថា៖«សង្គ្រាមជាមួយអ៊ីរ៉ង់ នឹងបញ្ចប់ក្នុងពេលឆាប់ៗនេះ គឺឆាប់ៗនេះឯង ព្រោះពួកគេក៏ចង់ឱ្យវាបញ្ចប់ដែរ»។
«ពួកគេ នឹងមិនអាចមានអាវុធនុយក្លេអ៊ែរបានឡើយ ហើយតម្លៃប្រេងនឹងធ្លាក់ចុះយ៉ាងគំហុក»។
មុននោះ ថ្លែងនៅក្នុងការជួបជុំមួយនៅរដ្ឋ Montana លោក ត្រាំ បានបង្ហាញពីភាពមិនច្បាស់លាស់ថា តើភាគីអាមេរិកកំពុងចរចាជាមួយមន្ត្រីអ៊ីរ៉ង់រូបណា ខណៈដែលទីក្រុងវ៉ាស៊ីនតោនកំពុងស្វែងរកវិធីបញ្ចប់ជម្លោះនេះ។
លោកនិយាយថា៖«ពួកគេគ្មានកងទ័ពជើងទឹកទេ ពួកគេគ្មានកងទ័ពអាកាសទេ កងទ័ពជើងគោករបស់ពួកគេត្រូវបានបំផ្លាញខ្ទេចខ្ទី។ មេដឹកនាំរបស់ពួកគេក៏លែងមានទៀតហើយ»។
លោកបន្តថា៖ «តាមពិតទៅ ខ្ញុំគួរតែទុកមេដឹកនាំរបស់ពួកគេឱ្យនៅដដែល ព្រោះខ្ញុំមិនដឹងថា តើពួកយើងកំពុងចរចាជាមួយអ្នកណាឱ្យប្រាកដនោះទេ»។
ប្រធានាធិបតីរូបនេះ ក៏បានរៀបរាប់ដែរថា អ៊ីរ៉ង់ធ្លាប់ជាកម្លាំងយោធាដ៏មានឥទ្ធិពលនៅក្នុងតំបន់មជ្ឈិមបូព៌ា ប៉ុន្តែប្រតិបត្តិការយោធារបស់សហរដ្ឋអាមេរិកបានធ្វើឱ្យសមត្ថភាពរបស់ពួកគេចុះខ្សោយយ៉ាងខ្លាំង។ លោកបាននិយាយថា៖ «អ៊ីរ៉ង់ធ្លាប់ជាអ្នកគំរាមកំហែងគេឯងនៅក្នុងតំបន់មជ្ឈិមបូព៌ា» ដោយបន្ថែមថា ប្រទេសនេះលែងមានអំណាចខ្លាំងក្លាដូចមុនទៀតហើយ។
លោក ត្រាំ បានអះអាងថា ការវាយប្រហាររបស់សហរដ្ឋអាមេរិកបានបំផ្លាញកងនាវាចររបស់អ៊ីរ៉ង់ និងធ្វើឱ្យយន្តហោះយោធារបស់ពួកគេលែងអាចប្រើប្រាស់បាន។
លោកលើកឡើងថា អ៊ីរ៉ង់ធ្លាប់មាននាវាចំនួន ១៥៩គ្រឿង ប៉ុន្តែឥឡូវនេះមិនមាននាវាណាមួយអាចដំណើរការបានទៀតទេ ហើយលោកក៏បានអះអាងដែរថា យន្តហោះចម្បាំងរបស់ពួកគេត្រូវបានបំផ្លាញចោលនៅលើផ្លូវរត់យន្តហោះ (runways) នៅក្នុងប្រទេសនោះ៕
