រដ្ឋមន្ត្រីការបរទេសតួកគី លោក ហាកាន ហ្វីដាន នឹងរៀបចំកិច្ចប្រជុំជាមួយរដ្ឋមន្ត្រីការបរទេសនៃប្រទេសចំនួន៦ផ្សេងទៀត នៅទីក្រុងអ៊ីស្តង់ប៊ុល ប្រទេសតួកគី នៅថ្ងៃសុក្រ ទី២៣ ខែតុលា ឆ្នាំ២០២៦។
ប្រភពពីសារព័ត៌មានAA news។
ប្រទេសទាំង ៧ ដែលចូលរួមមាន តួកគី អេហ្ស៊ីប ប៉ាគីស្ថាន អារ៉ាប៊ីសាអូឌីត អង់គ្លេស អាល្លឺម៉ង់ និងបារាំង។ នេះជាលើកដំបូងដែលប្រទេសទាំងនេះជួបប្រជុំគ្នាក្នុងទម្រង់រួមនេះ។
កិច្ចប្រជុំនឹងពិភាក្សាអំពីបញ្ហាសំខាន់ៗ រួមមានសង្គ្រាមនៅតំបន់ប៉ាឡេស្ទីន ស្ថានការណ៍នៅច្រកសមុទ្រហ័រមូស បញ្ហានៅប្រទេសយេម៉ែន និងសង្គ្រាមរវាងរុស្ស៊ីនិងអ៊ុយក្រែន។
រដ្ឋមន្ត្រីការបរទេសតួកគីនឹងជំរុញឱ្យប្រទេសនានាដោះស្រាយជម្លោះតាមរយៈការចរចា ដោយមិនប្រើកម្លាំងយោធា ព្រោះការប្រើប្រាស់អាវុធអាចធ្វើឱ្យសង្គ្រាមកាន់តែធ្ងន់ធ្ងរ និងរាលដាលទៅប្រទេសផ្សេងទៀត។
ចំពោះបញ្ហានៅមជ្ឈិមបូព៌ា លោកនឹងលើកឡើងពីស្ថានការណ៍នៅប៉ាឡេស្ទីន និងជម្លោះរវាងសហរដ្ឋអាមេរិកនិងអ៊ីរ៉ង់។ លោកយល់ថា ការចរចា និងការទូតគឺជាមធ្យោបាយសំខាន់ក្នុងការស្វែងរកដំណោះស្រាយយូរអង្វែង។
កិច្ចប្រជុំនេះក៏នឹងពិភាក្សាអំពីការវាយប្រហាររបស់ក្រុមហ៊ូទីនៅយេម៉ែន ដែលប៉ះពាល់ដល់ប្រជាជន និងហេដ្ឋារចនាសម្ព័ន្ធនៅអារ៉ាប៊ីសាអូឌីត។ តួកគីនឹងបង្ហាញការគាំទ្រចំពោះសន្តិសុខរបស់អារ៉ាប៊ីសាអូឌីត។
លើសពីនេះ ប្រទេសទាំង ៧ នឹងពិភាក្សាអំពីការរក្សាសន្តិភាពនៅប្រទេសស៊ីរី និងការបញ្ចប់សង្គ្រាមរវាងរុស្ស៊ីនិងអ៊ុយក្រែន ដើម្បីកុំឱ្យជម្លោះបន្តរីករាលដាល និងបង្កឱ្យមានអ្នកស្លាប់កាន់តែច្រើន។
គោលបំណងសំខាន់នៃកិច្ចប្រជុំនេះ គឺជំរុញឱ្យប្រទេសនានាសហការគ្នា ដោះស្រាយជម្លោះតាមការចរចា និងរក្សាសន្តិសុខក្នុងតំបន់៕
