វិមានក្រឹមឡាំងបានប្រកាសនៅថ្ងៃទី២៣ ខែតុលា ឆ្នាំ២០២៦ ថា រុស្ស៊ី អ៊ុយក្រែន និងសហរដ្ឋអាមេរិក គ្រោងបើកកិច្ចចរចាបីភាគីនៅទីក្រុងអាប៊ូដាប៊ី ប្រទេសអេមីរ៉ាតអារ៉ាប់រួម នៅពាក់កណ្តាលខែវិច្ឆិកា ដើម្បីស្វែងរកដំណោះស្រាយបញ្ចប់សង្គ្រាមរវាងរុស្ស៊ី និងអ៊ុយក្រែន។
សារព័ត៌មានAl Jazeera។
អ្នកនាំពាក្យវិមានក្រឹមឡាំង លោក ឌីមីទ្រី ពេស្កូវ បានបញ្ជាក់ថា កិច្ចចរចានេះនឹងធ្វើឡើងដោយមានការចូលរួមពីប្រទេសទាំងបី និងសម្របសម្រួលដោយសហរដ្ឋអាមេរិក។
កិច្ចចរចាលើកនេះ គឺជាការប៉ុនប៉ងបន្តការចរចាឡើងវិញ បន្ទាប់ពីកិច្ចពិភាក្សាកាលពីដើមឆ្នាំមិនទទួលបានលទ្ធផលច្រើន ហើយត្រូវបានផ្អាកដោយសាររដ្ឋបាលអាមេរិកផ្តោតលើសង្គ្រាមជាមួយអ៊ីរ៉ង់។
ក្តីសង្ឃឹមក្នុងការសម្រេចបានកិច្ចព្រមព្រៀងនៅតែមានកម្រិត ដោយសាររុស្ស៊ីនៅតែទាមទារឱ្យអ៊ុយក្រែនប្រគល់ទឹកដីមួយចំនួន និងយល់ព្រមមិនចូលជាសមាជិកអង្គការណាតូ។
បន្ថែមពីនេះប្រធានាធិបតីរុស្ស៊ី លោក វ្ល៉ាឌីមៀ ពូទីន បានលើកឡើងថា កិច្ចចរចាគួរផ្តោតលើការរៀបចំសន្តិសុខរយៈពេលវែង ដើម្បីឈានទៅរកកិច្ចព្រមព្រៀងសន្តិភាពយូរអង្វែង មិនមែនគ្រាន់តែផ្អាកការប្រយុទ្ធក្នុងរយៈពេលខ្លីនោះទេ។
ទោះជាយ៉ាងណា លទ្ធផលនៃកិច្ចចរចានាពេលខាងមុខនៅមិនទាន់ច្បាស់លាស់ទេ ដោយភាគីទាំងពីរនៅមានការខ្វែងគំនិតគ្នាលើបញ្ហាទឹកដី និងសន្តិសុខ៕
