រដ្ឋមន្ត្រីក្រសួងមហាផ្ទៃបារាំង លោក Laurent Nunez បានប្រកាសនៅថ្ងៃសុក្រទី២៣.១០.២០២៦ថារដ្ឋាភិបាលបារាំង នឹងដាក់ពង្រាយកងកម្លាំងសន្តិសុខចំនួន៧០.០០០ នាក់ មុនពេលមានការតវ៉ាទូទាំងប្រទេស ដែលគ្រោងនឹងធ្វើឡើងនៅថ្ងៃសៅរ៍ ហើយលោកបានសន្យាថា នឹងចាត់វិធានការយ៉ាងតឹងរ៉ឹងចំពោះអំពើហិង្សា។
សារព័ត៌មានAnadolu។
លោក Nunez ថ្លែងនៅក្នុងសន្និសីទសារព័ត៌មានមួយថា៖«ខ្ញុំក៏សូមព្រមានផងដែរ ដល់អ្នកណាដែលគិតនឹងមកប្រព្រឹត្តអំពើហិង្សាថា៖ យើងនឹងមិនមានការយោគយល់អ្វីឡើយ នៅថ្ងៃស្អែកនេះ យើងនឹងចាត់វិធានការតឹងរ៉ឹងបំផុត»។
លោកបញ្ជាក់ថា ប៉ូលិស និងកងកម្លាំងសន្តិសុខ (gendarmes) សរុបចំនួន ៧០.០០០នាក់ នឹងត្រូវដាក់ពង្រាយនៅតាមទីសាធារណៈទូទាំងប្រទេស។
លោក Nunez បាននិយាយថា៖ «យើងនឹងធ្វើគ្រប់យ៉ាងដែលចាំបាច់ ដើម្បីទប់ស្កាត់ការលួចប្លន់ អំពើហិង្សា និងការវាយប្រហារលើអគារសាធារណៈ»។
លោកបានសង្កត់ធ្ងន់ថា ការដាក់ពង្រាយកងកម្លាំងនៅថ្ងៃសៅរ៍នេះ នឹងប្រមូលផ្តុំធនធាន និងប្រើប្រាស់បុគ្គលិកព្រមទាំងសេវាកម្មនានា«ដែលជាធម្មតាមិនត្រូវបានចាត់ឱ្យបំពេញបេសកកម្មប្រភេទនេះទេ»។
លោក Nunez បានកត់សម្គាល់ថា ពួកគេបានចល័តអង្គភាពជំនាញពិសេសៗ រួមទាំងអង្គភាពកងកម្លាំងពិសេស (elite units)ឱ្យទៅប្រចាំការរង់ចាំនៅទីតាំងនានា។
លោកបានបន្ថែមថា អង្គភាពជំនាញទាំងផ្លូវអាកាស និងផ្លូវគោក រួមទាំងយន្តហោះគ្មានមនុស្សបើក(drones) និង«ឧទ្ធម្ភាគចក្រមួយចំនួនធំ» ក៏នឹងត្រូវដាក់ពង្រាយនៅទូទាំងតំបន់ប៉ារីស និងតំបន់ផ្សេងទៀតនៃប្រទេសបារាំងផងដែរ។
លោក Nunez បានបញ្ជាក់បន្ថែមថា៖ «ខ្ញុំបានរៀបចំប្រតិបត្តិការនេះឱ្យមានភាពចល័តខ្ពស់ ឆាប់រហ័ស និងមានកម្លាំងខ្លាំងក្លា។ រាល់ក្រុមដែលមានហានិភ័យខ្ពស់នឹងក្លាយជាគោលដៅរបស់យើង»។
លោកបានបន្ថែមថា នឹងមានការចាប់ខ្លួនមនុស្សជាច្រើន ប្រសិនបើមានអំពើហិង្សាកើតឡើង។
លោក Nunez បាននិយាយថា៖ «យើងបានបង្កើតអង្គភាពពិសេសនៅក្នុងគ្រប់ខេត្ត/តំបន់ រួមទាំងនៅទីស្នាក់ការប៉ូលិសក្រុងប៉ារីស ដើម្បីចាត់ការលើការចាប់ខ្លួនឱ្យបានឆាប់រហ័សបំផុត និងបញ្ជូនអ្នកដែលត្រូវបានចាប់ខ្លួនទៅកាន់តុលាការដោយមិនបង្អង់យូរឡើយ»៕
