អង្គការសហប្រជាជាតិ(UN)បានព្រមានថា គ្រោះមហន្តរាយមនុស្សធម៌ដ៏ធ្ងន់ធ្ងរមួយកំពុងកើតឡើង នៅក្នុងទីក្រុង Taiz នៃប្រទេសយេម៉ែន។
បន្ទាប់ពីក្រុម Houthi បានឡោមព័ទ្ធទីក្រុងនេះអស់រយៈពេលជិត ៣ សប្តាហ៍មកហើយ ដែលរារាំងមិនឱ្យមានការដឹកជញ្ជូនសម្ភារៈចាំបាច់នានាចូលទៅក្នុងទីក្រុងបាន។
សារព័ត៌មានAl Jazeera នៅថ្ងៃទី២៤.១០.២០២៦។
ក្រុម Houthi ដែលគាំទ្រដោយប្រទេសអ៊ីរ៉ង់ បានឡោមព័ទ្ធទីក្រុង Taiz តាំងពីដើមខែតុលាមក ។
ដោយបានកាត់ផ្តាច់ផ្លូវដែលតភ្ជាប់ទីក្រុងនេះទៅកាន់ទីក្រុង Aden ដែលបច្ចុប្បន្នជាទីក្រុងរដ្ឋធានីបណ្តោះអាសន្នរបស់រដ្ឋាភិបាលយេម៉ែន ដែលត្រូវបានទទួលស្គាល់ដោយអន្តរជាតិ។
ចាប់តាំងពីពេលនោះមក ស្ទើរតែគ្មានប្រេងឥន្ធនៈ អាហារ ឬសម្ភារៈចាំបាច់ផ្សេងទៀត អាចដឹកជញ្ជូនចូលទៅក្នុងទីក្រុងនេះបានឡើយ។
លោក Jens Laerke អ្នកនាំពាក្យការិយាល័យសម្របសម្រួលកិច្ចការមនុស្សធម៌របស់អង្គការសហប្រជាជាតិ (OCHA) បានថ្លែងនៅក្នុងសន្និសីទសារព័ត៌មានមួយនៅទីក្រុងហ្សឺណែវ កាលពីថ្ងៃសុក្រថា៖ «វាមានរយៈពេល ២០ថ្ងៃហើយ ដែលទីក្រុង Taiz ត្រូវបានកាត់ផ្តាច់ពីពិភពខាងក្រៅ។
យើងសង្កេតឃើញកាន់តែច្បាស់ថា ការប្រយុទ្ធគ្នានេះធ្វើឱ្យយើងមិនអាចចូលទៅក្នុងទីក្រុងបាន ហើយប្រជាជនក៏មិនអាចចេញពីទីក្រុងបានដែរ»។
លោក Laerke បានឱ្យដឹងថា ប្រជាជនភាគច្រើនពឹងផ្អែកលើទឹកដែលដឹកជញ្ជូនតាមរថយន្តដឹកទំនិញ ប៉ុន្តែតម្លៃទឹកទាំងនោះបានកើនឡើងដល់ទៅ ៣ ដង។ លើសពីនេះ ឧស្ម័នសម្រាប់ចម្អិនអាហារក៏ «ស្ទើរតែរកទិញមិនបាន» ដែរ ដែលបង្កជាការគំរាមកំហែងដល់ដំណើរការនៃផ្ទះបាយសហគមន៍ ដែលផ្តល់អាហារដល់គ្រួសារនានានៅទីនោះ។
យោងតាមកម្មវិធីស្បៀងអាហារពិភពលោក (WFP) របស់អង្គការសហប្រជាជាតិ មនុស្សជាង ៨០០,០០០ នាក់នៅក្នុងទីក្រុង Taiz កំពុងត្រូវបានកាត់ផ្តាច់ពីជំនួយសង្គ្រោះ ដោយក្នុងនោះប្រហែល ៣ ភាគ ៤ ពឹងផ្អែកលើជំនួយមនុស្សធម៌។ ក្នុងចំណោមនោះ មានស្ត្រី និងកុមារយ៉ាងហោចណាស់ ២០០,០០០ នាក់។
លោក Laerke បានបញ្ជាក់ថា ទោះបីជាក្រុមមនុស្សធម៌ក្នុងស្រុកអាចបន្តចែកចាយសម្ភារៈដែលនៅសេសសល់ ដើម្បីរក្សាដំណើរការម៉ាស៊ីនបូមទឹក និងមន្ទីរពេទ្យនានាក៏ដោយ ប៉ុន្តែលោកបានសង្កត់ធ្ងន់ថា៖«ពេលវេលាកំពុងតែអស់ទៅហើយ»៕
