កាលពីថ្ងៃទី២៣ ខែតុលា ឆ្នាំ២០២៦ អគារពហុជាន់មួយដែលកំពុងសាងសង់បានបាក់រលំនៅតំបន់ Eastleigh ក្នុងទីក្រុងណៃរ៉ូប៊ី រដ្ឋធានីប្រទេសកេនយ៉ា បណ្ដាលឱ្យមនុស្សជាច្រើននាក់បាត់ខ្លួន និងអាចមានមនុស្សជាប់នៅក្រោមគំនរបាក់បែក។
សារព័ត៌មានAl Jazeera។
ហេតុការណ៍នេះបានកើតឡើងនៅម៉ោងប្រហែល១រសៀល ក្នុងតំបន់ពាណិជ្ជកម្មដែលមានប្រជាជន និងអ្នកលក់ដូរច្រើន។
តាមមន្ត្រីក្រសួងមហាផ្ទៃកេនយ៉ា នៅពេលអគារបាក់រលំ មានកម្មករ ៦៧ នាក់កំពុងធ្វើការ។ ក្នុងនោះ ម្នាក់បានរងរបួស ខណៈ ៦៦ នាក់ផ្សេងទៀតបានរួចផុតពីគ្រោះថ្នាក់។ ប៉ុន្តែ មនុស្សប្រហែល ១១ នាក់ដែលស្ថិតនៅក្នុងហាងលក់គ្រឿងអេឡិចត្រូនិក ហាងលក់សាច់ និងហាងលក់គ្រឿងទេសនៅជាន់ក្រោម នៅមិនទាន់រកឃើញនៅឡើយទេ។
ក្រុមសង្គ្រោះបាននិងកំពុងប្រើគ្រឿងចក្រ និងឧបករណ៍ផ្សេងៗ ដើម្បីរុករកអ្នកនៅរស់រានមានជីវិតនៅក្រោមគំនរបេតុង។ ប្រតិបត្តិការជួយសង្គ្រោះត្រូវបានគេរំពឹងថា នឹងបន្តពេញមួយយប់ថ្ងៃសុក្រ និងថ្ងៃសៅរ៍។
មន្ត្រីបានបញ្ជាក់ថា អគារនេះមិនទាន់មានលិខិតអនុញ្ញាតឱ្យប្រើប្រាស់នៅឡើយទេ ប៉ុន្តែជាន់ក្រោមត្រូវបានជួលឱ្យធ្វើអាជីវកម្មរួចហើយ។ ហេតុការណ៍នេះបានបង្កឱ្យមានសំណួរអំពីការទទួលខុសត្រូវរបស់ម្ចាស់គម្រោងសាងសង់ និងអាជ្ញាធរពាក់ព័ន្ធ៕
