ក្រសួងមហាផ្ទៃបារាំង បានឱ្យដឹងកាលពីថ្ងៃអាទិត្យទី២៥.១០.២០២៦ថា អាជ្ញាធរបារាំងបានចាប់ខ្លួនមនុស្សចំនួន១.៣១៤ នាក់ ក្នុងអំឡុងពេលបាតុកម្មទូទាំងប្រទេសកាលពីថ្ងៃសៅរ៍ទី២៤.១០.២០២៦ ខណៈដែលមន្ត្រីសន្តិសុខចំនួន៥៣នាក់បានរងរបួស។
យោងតាមការរាយការណ៍ របស់ស្ថានីយទូរទស្សន៍ BFMTV តួលេខនេះបង្ហាញពីការថយចុះយ៉ាងខ្លាំង បើធៀបនឹងថ្ងៃដំបូង នៃការធ្វើបាតុកម្មកាលពីថ្ងៃទី១៧ខែតុលា ដែលមានមនុស្សចំនួន២.៦២៨ នាក់ត្រូវបានចាប់ខ្លួន និងមន្ត្រីសន្តិសុខចំនួន ១.១៤៤នាក់បានរងរបួស។
ក្រសួងបានឱ្យដឹងថា មានមនុស្សចំនួន ៤១០.០០០ នាក់បានចូលរួមក្នុងបាតុកម្មកាលពីថ្ងៃសៅរ៍ នៅទូទាំងប្រទេសបារាំង ក្នុងនោះមាន ១១០.០០០នាក់នៅទីក្រុងប៉ារីស។
ទោះជាយ៉ាងណាក៏ដោយ សហជីពនានាបានប៉ាន់ប្រមាណថា ចំនួនអ្នកចូលរួមទូទាំងប្រទេសមានជិត ៨០០.០០០ នាក់ ដោយក្នុងនោះមាន ២៥០.០០០នាក់នៅរដ្ឋធានីប៉ារីស។
ក្រសួង៖ បានបញ្ជាក់ថា មានអាជីវកម្មចំនួន២៤ ត្រូវបានគេលួចប្លន់ក្នុងអំឡុងពេលបាតុកម្ម បើធៀបនឹងចំនួន១.៥២២ អាជីវកម្មកាលពីមួយសប្តាហ៍មុន ដែលបង្ហាញពីការថយចុះជាង ៩៨%។
ក្រសួង ក៏បានរាយការណ៍ផងដែរថា មានករណីអន្តរាគមន៍ពាក់ព័ន្ធនឹងអគ្គិភ័យចំនួន៧៥ករណី ដែលបានថយចុះពីចំនួន២.០២៥ ករណីកាលពីថ្ងៃទី ១៧ ខែតុលា។
រដ្ឋមន្ត្រីក្រសួងមហាផ្ទៃ លោក Laurent Nunez បានវាយតម្លៃលទ្ធផលរួមនៃបាតុកម្ម កាលពីថ្ងៃសៅរ៍ថា ជាចំណុចវិជ្ជមាន ដោយលោកបានលើកឡើងថា វិធានការសន្តិសុខបានជួយទប់ស្កាត់ការលួចប្លន់ទ្រង់ទ្រាយធំ និងការខូចខាតដល់អគារសាធារណៈនានា។
ការចាប់ខ្លួន និងហេតុការណ៍ផ្សេងៗនៅទីក្រុង Marseille និងទីក្រុងប៉ារីស
នៅទីក្រុង Marseille មនុស្សចំនួន ៧១នាក់ (ក្នុងនោះមានមនុស្សពេញវ័យ ៤០នាក់) ត្រូវបានចាប់ខ្លួនក្នុងអំឡុងពេលបាតុកម្មកាលពីថ្ងៃសៅរ៍។
មនុស្សសរុបចំនួន ៦១នាក់ត្រូវបានឃាត់ខ្លួនដោយប៉ូលិស ខណៈដែលអាជីវកម្មចំនួន ៧ត្រូវបានគេលួចប្លន់ ឬបំផ្លិចបំផ្លាញ។
អភិបាលក្រុង Marseille លោក Benoit Payan បានពណ៌នាបាតុកម្មនេះថាជា “សន្តិវិធី”ទោះបីជាមានហេតុការណ៍តូចតាចមួយចំនួនកើតឡើងនៅចុងបញ្ចប់នៃការដើរក្បួនក៏ដោយ។
លោកបាននិយាយថា ស្ថានភាពគឺស្ងប់ស្ងាត់ជាងពេលធ្វើបាតុកម្មកាលពីថ្ងៃទី១៧ ខែតុលា យ៉ាងខ្លាំង ដោយកាលនោះមានអាជីវកម្មជាច្រើនត្រូវបានគេលួចប្លន់នៅក្នុងទីក្រុងនេះ។
ប៉ូលិសទីក្រុងប៉ារីស បានឱ្យដឹងថា នៅទីក្រុងប៉ារីស មនុស្សចំនួន១៤២ នាក់ត្រូវបានចាប់ខ្លួន ក្នុងនោះមាន១២៦ នាក់ត្រូវបានឃាត់ខ្លួនដោយប៉ូលិស។
អាជីវកម្មចំនួន២ ត្រូវបានខូចខាត ដែលក្នុងនោះមានមួយកន្លែងត្រូវបានគេលួចប្លន់ផងដែរ។
ខណៈដែលប៉ូលិស បានរារាំងក្រុមអ្នកតវ៉ាមិនឱ្យចូលទៅក្នុងទីតាំងអាជីវកម្មមួយផ្សេងទៀត។
ទន្ទឹមនឹងនេះ មនុស្សម្នាក់បានរងរបួសដៃយ៉ាងធ្ងន់ធ្ងរក្នុងអំឡុងពេលការតវ៉ានៅទីក្រុង Clermont-Ferrand ប៉ុន្តែអាជ្ញាធរបានបញ្ជាក់ថា មិនមានការដាច់ម្រាមដៃនោះទេ។
មនុស្សម្នាក់ទៀតក៏បានរងរបួសដៃយ៉ាងធ្ងន់ធ្ងរផងដែរ ក្នុងអំឡុងពេលការតវ៉ានៅទីក្រុង Toulouse៕
