មនុស្សយ៉ាងហោចណាស់ ១២ នាក់ ក្នុងនោះមានអនីតិជន ៦ នាក់ បានរងរបួសក្នុងហេតុការណ៍បាញ់ប្រហារមួយនៅជិតកីឡដ្ឋាន Bragg Memorial នៃសាកលវិទ្យាល័យ Florida A&M ក្នុងរដ្ឋផ្លរីដា សហរដ្ឋអាមេរិក កាលពីយប់ថ្ងៃសៅរ៍ ទី២៤ ខែតុលា ឆ្នាំ២០២៦។
សារព័ត៌មានAnadolu Agency។
ប្រធានប៉ូលិសទីក្រុងតាឡាហាស៊ី លោក Lawrence Revell បានឱ្យដឹងថា ជនរងគ្រោះ ១១ នាក់បានរងរបួសដោយសារគ្រាប់កាំភ្លើង ខណៈមនុស្សម្នាក់ទៀត ដែលជាជីដូនរបស់ជនរងគ្រោះម្នាក់ បានរងរបួសពេលរត់គេចពីកន្លែងកើតហេតុ។
ក្នុងចំណោមជនរងគ្រោះទាំង ១២ នាក់ មានមនុស្សពេញវ័យ ៦ នាក់ និងអនីតិជន ៦ នាក់ ដោយជនរងគ្រោះដែលមានអាយុតិចបំផុតមានអាយុ ១១ ឆ្នាំ។ យ៉ាងហោចណាស់ ៣ នាក់រងរបួសធ្ងន់ ក្នុងនោះម្នាក់ស្ថិតក្នុងស្ថានភាពធ្ងន់ធ្ងរបំផុត ខណៈ ៨ នាក់ផ្សេងទៀតមានស្ថានភាពនឹងនរ។
ប៉ូលិសបានបញ្ជាក់ថា ព័ត៌មានបឋមបង្ហាញថា ហេតុការណ៍នេះអាចកើតចេញពីជម្លោះរវាងមនុស្សមួយក្រុម ប៉ុន្តែការស៊ើបអង្កេតនៅតែបន្ត។
ការបាញ់ប្រហារបានកើតឡើងមិនយូរប៉ុន្មានបន្ទាប់ពីការប្រកួតបាល់ទាត់របស់សាកលវិទ្យាល័យត្រូវបានបញ្ចប់។ អាជ្ញាធរបានបញ្ជូនកម្លាំងប៉ូលិសជាច្រើនទៅកាន់កន្លែងកើតហេតុ និងបានចេញសេចក្ដីជូនដំណឹងឱ្យប្រជាជននៅក្បែរនោះស្នាក់នៅក្នុងទីតាំងមានសុវត្ថិភាព ឬជៀសវាងតំបន់នោះ។
សូមបញ្ជាក់ថា៖ សាកលវិទ្យាល័យ Florida State ក៏បានណែនាំឱ្យនិស្សិត បុគ្គលិក និងសាស្ត្រាចារ្យស្នាក់នៅក្នុងអគារជាបណ្ដោះអាសន្ន ដើម្បីសុវត្ថិភាព ដោយបញ្ជាក់ថា មិនទាន់មានព័ត៌មានបង្ហាញថា សមាជិកសហគមន៍សាកលវិទ្យាល័យរបស់ខ្លួនពាក់ព័ន្ធនឹងហេតុការណ៍នេះទេ៕
