នៅថ្ងៃអាទិត្យ ទី២៥ ខែតុលា ឆ្នាំ២០២៦ អារ៉ាប៊ីសាអូឌីតបានស្ទាក់ចាប់ដ្រូន និងមីស៊ីលជាច្រើនគ្រឿង ដែលត្រូវបានបាញ់ឆ្ពោះទៅកាន់រដ្ឋធានីរីយ៉ាដ និងតំបន់ភាគខាងត្បូងរបស់ប្រទេស ខណៈការប្រយុទ្ធជាមួយក្រុមហ៊ូទី ដែលគាំទ្រដោយអ៊ីរ៉ង់នៅតែបន្ត។
សារព័ត៌មានReuter។
ក្រុមចម្រុះដឹកនាំដោយអារ៉ាប៊ីសាអូឌីតបានឱ្យដឹងថា ដ្រូនពីរគ្រឿង និងមីស៊ីលបាលីស្ទិកមួយគ្រាប់ត្រូវបានបាញ់ឆ្ពោះទៅរដ្ឋធានីរីយ៉ាដ។ ចំណែកមីស៊ីលគ្រូសមួយគ្រាប់ត្រូវបានបាញ់ឆ្ពោះទៅទីក្រុងខាមីស មូសៃត។ ក្រោយមក ក្រុមចម្រុះបានប្រកាសថា ខ្លួនបានស្ទាក់ចាប់មីស៊ីលបាលីស្ទិកចំនួន ១០ គ្រាប់ទៀត ដែលបាញ់ឆ្ពោះទៅភាគខាងត្បូងប្រទេស។
អាជ្ញាធរការពារជនស៊ីវិលអារ៉ាប៊ីសាអូឌីតបានចេញសារព្រមានអាសន្ននៅទីក្រុងរីយ៉ាដ អាបហា និងខាមីស មូសៃត មុនពេលប្រកាសថា គ្រោះថ្នាក់បានកន្លងផុតទៅ។
ទន្ទឹមនឹងនេះ ក្រុមហ៊ូទីបានព្រមានថា អាកាសយានដ្ឋានអន្តរជាតិឃីង ខាលីដ ក្នុងរដ្ឋធានីរីយ៉ាដ នៅតែជាគោលដៅយោធារបស់ខ្លួន ហើយបានអំពាវនាវឱ្យក្រុមហ៊ុនអាកាសចរណ៍ បុគ្គលិកអាកាសយានដ្ឋាន និងអ្នកដំណើរ ជៀសវាងការប្រើប្រាស់អាកាសយានដ្ឋាននេះ។
អាកាសយានដ្ឋានខាងលើបានផ្អាកប្រតិបត្តិការចាប់ពីថ្ងៃទី១០ ខែតុលា បន្ទាប់ពីការវាយប្រហារមួយដែលក្រុមហ៊ូទីអះអាងថាជាស្នាដៃរបស់ខ្លួន បណ្តាលឱ្យមនុស្ស ១៣ នាក់ស្លាប់ និងជាង ៣០០ នាក់រងរបួស។ កាលពីថ្ងៃអាទិត្យ អាកាសយានដ្ឋានបានចាប់ផ្តើមដំណើរការឡើងវិញនៅស្ថានីយអ្នកដំណើរចំនួនពីរ។
ជាការឆ្លើយតប អារ៉ាប៊ីសាអូឌីតបានបង្កើនការវាយប្រហារតាមអាកាសលើក្រុមហ៊ូទី បន្ទាប់ពីក្រុមនេះបានដណ្តើមកាន់កាប់តំបន់យុទ្ធសាស្ត្រនៅតាមឆ្នេរសមុទ្រក្រហមកាលពីខែមុន។
ជម្លោះនេះកំពុងបង្កើនភាពតានតឹងនៅមជ្ឈិមបូព៌ា និងបង្កការព្រួយបារម្ភចំពោះសន្តិសុខផ្លូវដឹកជញ្ជូនតាមសមុទ្រក្រហម ជាពិសេសច្រកសមុទ្របាប អាល់ម៉ាន់ដាប ដែលជាផ្លូវដឹកជញ្ជូនសំខាន់សម្រាប់ពាណិជ្ជកម្មអន្តរជាតិ និងការដឹកជញ្ជូនប្រេង៕
