ពោលគឺ១ថ្ងៃ បន្ទាប់ពីមានការតវ៉ាទ្រង់ទ្រាយធំ និងការប៉ះទង្គិចគ្នា នៅក្នុងទីក្រុងប៉ារីស បរិយាកាសក្នុងចំណោមអ្នកគាំទ្រកីឡាបាល់ឱបអាមេរិក(American Football) ដែលបានចូលរួមទស្សនាការប្រកួត NFL លើកដំបូងនៅប្រទេសបារាំង កាលពីថ្ងៃអាទិត្យទី២៥.១០.២០២៦ គឺពោរពេញទៅដោយភាពរីករាយ និងភាពរស់រវើក។
សារព័ត៌មាន(AP)។
អ្នកគាំទ្រក្រុម Pittsburgh Steelers និងក្រុម New Orleans Saints បានជួបជុំគ្នានៅជុំវិញពហុកីឡដ្ឋាន Stade de France មុនពេលការប្រកួតចាប់ផ្តើម។
ទោះបីជាមានវត្តមានប៉ូលិស នៅទីនោះក៏ដោយ ក៏ពួកគេមិនបានបង្កឱ្យមានភាពតានតឹងអ្វីឡើយ។
ខណៈដែលមានអ្នកគាំទ្រប្រហែល ៧៦,០០០នាក់បានចូលរួមទស្សនាការប្រកួតដែលសំបុត្រត្រូវបានលក់អស់គ្មានសល់។
ក្រុម Steelers បានយកឈ្នះក្នុងលទ្ធផល ១៦-១០ ក្នុងបរិយាកាសដ៏រីករាយ ដែលមានទាំងការសម្តែងតន្ត្រីផ្ទាល់ និងការចូលរួមពីសំណាក់អ្នកគាំទ្រ។
ឱកាសពិសេសនេះ គឺជាលើកដំបូងហើយដែលគ្រួសារ Moore បានធ្វើដំណើរមកកាន់ទីក្រុងនេះ។ សមាជិកគ្រួសារទាំង ៤នាក់សុទ្ធតែស្លៀកអាវក្រុម Saints ដោយមានសរសេរពាក្យថា“The Moore Family in Paris”(គ្រួសារ Moore នៅទីក្រុងប៉ារីស) នៅផ្នែកខាងក្រោយ។
អ្នកស្រី Alicia Moore បានប្រាប់ទីភ្នាក់ងារសារព័ត៌មាន The Associated Press នៅខាងក្រៅពហុកីឡដ្ឋានថា៖«ពួកយើងកំពុងប្រារព្ធពិធីខួបកំណើតគម្រប់៧០ឆ្នាំរបស់ប៉ាពួកយើង ដូច្នេះពួកយើងពិតជារំភើបណាស់ដែលបានមកចូលរួមទស្សនាការប្រកួត NFL លើកដំបូងនៅទីក្រុងប៉ារីស»។
អ្នកស្រីសង្ឃឹមថា នឹងមានការប្រកួត NFL បន្ថែមទៀតនៅក្នុងប្រទេសបារាំងនាពេលអនាគត។
អ្នកស្រីបាននិយាយថា៖«ខ្ញុំគិតថាវាពិតជាអស្ចារ្យណាស់ ដែលយើងបាននាំយកវប្បធម៌របស់យើងមកទីនេះ»។
បញ្ហាសន្តិសុខនៅក្នុងប្រទេសបារាំងបានក្លាយជាប្រធានបទក្តៅគគុក នៅលើប្រព័ន្ធផ្សព្វផ្សាយ ក្នុងរយៈពេលប៉ុន្មានថ្ងៃចុងក្រោយនេះ ប៉ុន្តែវាមិនបានធ្វើឱ្យពួកគេមានក្តីបារម្ភខ្លាំងពេកនោះទេ៕
