មេដឹកនាំប្រទេសមួយចំនួននៅអាស៊ី បានផ្ញើសារអបអរសាទរលោក ល្វីស អ៊ីណាស៊ីយ៉ូ លូឡា ដា ស៊ីលវ៉ា បន្ទាប់ពីលោកទទួលបានជ័យជម្នះក្នុងការបោះឆ្នោតប្រធានាធិបតីប្រេស៊ីល នៅថ្ងៃទី២៦ ខែតុលា ឆ្នាំ២០២៦។
សារព័ត៌មានAnadolu Agency។
លោកលូឡាបានយកឈ្នះគូប្រជែង លោក ហ្វ្លាវីយ៉ូ បូលសូណារ៉ូ ដោយទទួលបានសំឡេងគាំទ្រ ៥១,៧៩% ខណៈលោកបូលសូណារ៉ូទទួលបាន ៤៨,២១%។ ជ័យជម្នះនេះនឹងអនុញ្ញាតឱ្យលោកលូឡាបន្តកាន់តំណែងប្រធានាធិបតីប្រេស៊ីលមួយអាណត្តិទៀត ដែលជាអាណត្តិទី៤ របស់លោក ប៉ុន្តែមិនជាប់គ្នា។
ប្រធានាធិបតីកូរ៉េខាងត្បូង លោក លី ជែ ម្យុង បានអបអរសាទរលោកលូឡា និងបង្ហាញជំនឿថា លោកនឹងបន្តដឹកនាំប្រេស៊ីលឆ្ពោះទៅរកអនាគតដ៏ល្អប្រសើរ។
ចំណែកនាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម បានចាត់ទុកជ័យជម្នះនេះថា ជាការទទួលបានការគាំទ្រជាថ្មីពីប្រជាជនប្រេស៊ីល។ លោកក៏បានលើកសរសើរការប្តេជ្ញាចិត្តរបស់លោកលូឡាក្នុងការលើកកម្ពស់យុត្តិធម៌សង្គម កាត់បន្ថយភាពក្រីក្រ និងជំរុញឱ្យប្រទេសកំពុងអភិវឌ្ឍមានសំឡេងកាន់តែខ្លាំងនៅលើឆាកអន្តរជាតិ។
លោកអាន់វ៉ាបានបន្ថែមថា ម៉ាឡេស៊ី និងប្រេស៊ីលអាចពង្រឹងកិច្ចសហប្រតិបត្តិការលើពាណិជ្ជកម្ម ការវិនិយោគ និងទំនាក់ទំនងរវាងអាស៊ាន និងអាមេរិកឡាទីន។
ដោយឡែក ប្រធានាធិបតីស្រីលង្កា លោក អានូរ៉ា គូម៉ារ៉ា ឌីសាណាយ៉ាកេ ក៏បានអបអរសាទរជ័យជម្នះនេះ ដោយចាត់ទុកថា វាជាសញ្ញាបង្ហាញពីការបដិសេធរបស់ប្រជាជនចំពោះអំពើពុករលួយ ការបែកបាក់ និងការបោកបញ្ឆោតផ្នែកនយោបាយ៕
