មនុស្សយ៉ាងហោចណាស់៦៤នាក់បានស្លាប់ និងប្រហែល ៨០នាក់រងរបួស បន្ទាប់ពីរថភ្លើងល្បឿនលឿនពីរគ្រឿងបានបុកគ្នានៅជិតស្ថានីយ៍ Urda ក្នុងខេត្ត Toledo ភាគកណ្តាលប្រទេសអេស្ប៉ាញ កាលពីព្រឹកថ្ងៃពុធ ទី២៨ ខែតុលា ឆ្នាំ២០២៦។
សារព័ត៌មានAnadolu Agency។
តាមរបាយការណ៍ រថភ្លើង AVE បានបុកពីក្រោយរថភ្លើង Iryo ដែលបានឈប់ ហើយចាប់ផ្តើមធ្វើដំណើរឡើងវិញ។ ហេតុការណ៍នេះបណ្តាលឱ្យទូរថភ្លើងពីរធ្លាក់ចេញពីផ្លូវដែក និងធ្លាក់ចុះតាមជម្រាលដី។
ក្រុមសង្គ្រោះបានរកឃើញសាកសពជាច្រើននៅក្នុង និងក្រោមរថភ្លើង ខណៈអ្នករងរបួសប្រហែល ៥៥នាក់ត្រូវបានបញ្ជូនទៅព្យាបាលនៅមន្ទីរពេទ្យ។ អាជ្ញាធរព្រមានថា ចំនួនអ្នកស្លាប់អាចកើនឡើងបន្ថែមទៀត ដោយសារប្រតិបត្តិការស្វែងរក និងជួយសង្គ្រោះកំពុងបន្ត។
នាយករដ្ឋមន្ត្រីអេស្ប៉ាញ លោក Pedro Sanchez បានលុបចោលកម្មវិធីដែលបានគ្រោងទុក ដើម្បីតាមដានស្ថានការណ៍។ ចំណែកសេវារថភ្លើងដែលតភ្ជាប់ទីក្រុងម៉ាឌ្រីដ ទីក្រុង Ciudad Real និងតំបន់ Andalusia ត្រូវបានផ្អាកជាបណ្តោះអាសន្ន។
មូលហេតុនៃគ្រោះថ្នាក់នេះកំពុងស្ថិតក្រោមការស៊ើបអង្កេត ដោយរបាយការណ៍ដំបូងបានលើកឡើងពីលទ្ធភាពនៃកំហុសមនុស្ស។ មេដឹកនាំអឺរ៉ុបជាច្រើនបានផ្ញើសាររំលែកទុក្ខដល់គ្រួសារជនរងគ្រោះ។
គ្រោះថ្នាក់នេះកើតឡើងប្រហែល ៩ខែ បន្ទាប់ពីគ្រោះថ្នាក់រថភ្លើងនៅភាគខាងត្បូងប្រទេសអេស្ប៉ាញ ដែលបានសម្លាប់មនុស្ស ៤៦នាក់ និងធ្វើឱ្យមនុស្សជាង ១២០នាក់រងរបួស៕
