អ៊ីស្រាអែល សម្លាប់ជនជាតិប៉ាឡេស្ទីន៦នាក់នៅតំបន់ហ្គាហ្សា!

ជនជាតិប៉ាឡេស្ទីនយ៉ាងហោចណាស់៦នាក់ បានស្លាប់ដោយសារការវាយប្រហាររបស់កងកម្លាំងអ៊ីស្រាអែលនៅតំបន់ហ្គាហ្សា ខណៈកងទ័ពអ៊ីស្រាអែលនៅតែបន្តវាយប្រហារ និងបំផ្លិចបំផ្លាញផ្ទះសម្បែងរបស់ប្រជាជន ទោះបីមានកិច្ចព្រមព្រៀងបទឈប់បាញ់ក៏ដោយ។

សារព័ត៌មានTRT World នៅថ្ងៃទី១៨ខែវិច្ឆិកា។

យោងតាមប្រភពវេជ្ជសាស្ត្រ និងមន្ត្រីក្នុងតំបន់ ការវាយប្រហារបានកើតឡើងនៅតំបន់ជាច្រើន រួមមាន ជំរំជនភៀសខ្លួន Jabalia, Deir al-Balah, Khan Younis និងតំបន់ភាគពាយ័ព្យទីក្រុងហ្គាហ្សា។ ក្នុងចំណោមអ្នកស្លាប់ មានបុរសអាយុ ២១ ឆ្នាំម្នាក់ និងកុមារអាយុ ៦ ឆ្នាំម្នាក់ ដែលបានស្លាប់ដោយសាររបួស បន្ទាប់ពីកងទ័ពអ៊ីស្រាអែលបាញ់ប្រហារលើតង់ជនភៀសខ្លួនដែលគ្រួសាររបស់កុមារកំពុងស្នាក់នៅ។
ក្រៅពីនេះ កងកម្លាំងអ៊ីស្រាអែលក៏បានប្រើប្រាស់ដ្រូនប្រភេទ Quadcopter ដើម្បីទម្លាក់គ្រឿងផ្ទុះលើផ្ទះប្រជាជន និងបំផ្លិចបំផ្លាញអគារលំនៅឋាន ព្រមទាំងហេដ្ឋារចនាសម្ព័ន្ធសាធារណៈនៅតំបន់កណ្តាលហ្គាហ្សាផងដែរ។
សាក្សីនៅក្នុងតំបន់បានរាយការណ៍ថា កងទ័ពអ៊ីស្រាអែលបានប្រើដ្រូនបញ្ជាពីចម្ងាយ ដើម្បីទម្លាក់ប្រអប់ដែលផ្ទុកគ្រឿងផ្ទុះកម្លាំងខ្លាំង បំផ្លាញអគារជាច្រើន ខណៈមានការបាញ់ផ្លោង និងការបាញ់ប្រហារពីកងទ័ពនៅលើដី។
សកម្មភាពទាំងនេះបានបង្កើនការព្រួយបារម្ភអំពីសុវត្ថិភាពប្រជាជនស៊ីវិល និងការរំលោភបំពានលើកិច្ចព្រមព្រៀងបទឈប់បាញ់នៅតំបន់ហ្គាហ្សា៕

Leave a Reply

Your email address will not be published. Required fields are marked *