អ៊ីស្រាអែល បន្តវាយប្រហារលើតំបន់ហ្គាហ្សា បណ្តាលឱ្យជនជាតិប៉ាឡេស្ទីន៣នាក់ស្លាប់និងជាច្រើននាក់ទៀតរងរបួស!

ជនជាតិប៉ាឡេស្ទីនយ៉ាងហោចណាស់៣នាក់បានស្លាប់ និងមនុស្សជាច្រើននាក់ទៀតរងរបួសក្នុងការវាយប្រហាររបស់កងទ័ពអ៊ីស្រាអែលនៅតំបន់ហ្គាហ្សា កាលពីថ្ងៃព្រហស្បតិ៍ ទី១៩ ខែវិច្ឆិកា ឆ្នាំ២០២៦។
សារព័ត៌មានAnadolu Agency។

យោងតាមប្រភពមន្ទីរពេទ្យ ការវាយប្រហារបានកើតឡើងនៅតំបន់ហ្សេតូន ក្នុងទីក្រុងហ្គាហ្សា ដោយកងទ័ពអ៊ីស្រាអែលបានប្រើកាំភ្លើងធំ និងយន្តហោះដ្រូនវាយប្រហារលើតំបន់ដែលមានជនស៊ីវិល និងកន្លែងស្នាក់នៅរបស់ប្រជាជនភៀសខ្លួន។ ក្នុងនោះ បុរសម្នាក់ត្រូវបានសម្លាប់ដោយការបាញ់ប្រហារពីដ្រូន។

នៅតំបន់កណ្តាលហ្គាហ្សា បុរសម្នាក់ទៀតបានស្លាប់ដោយសាររបួសពីការវាយប្រហារដ្រូនកាលពីប៉ុន្មានថ្ងៃមុន ខណៈមនុស្សម្នាក់ទៀតបានរងរបួសដោយសារការបាញ់ប្រហាររបស់កងទ័ពអ៊ីស្រាអែល។ ចំណែកនៅទីក្រុងខាន់យូនីស កុមារម្នាក់ និងស្ត្រីម្នាក់ក៏បានរងរបួសផងដែរ។

ការវាយប្រហារនេះកើតឡើង ទោះបីមានកិច្ចព្រមព្រៀងបទឈប់បាញ់ដែលចូលជាធរមានតាំងពីថ្ងៃទី១០ ខែតុលា ឆ្នាំ២០២៥ក៏ដោយ។ កាលពីថ្ងៃពុធ កងទ័ពអ៊ីស្រាអែលក៏បានចាប់ផ្តើមប្រតិបត្តិការយោធានៅតំបន់កណ្តាលហ្គាហ្សា ដែលបណ្តាលឱ្យផ្ទះសម្បែង និងហេដ្ឋារចនាសម្ព័ន្ធរបស់ប្រជាជនរងការខូចខាតយ៉ាងធ្ងន់ធ្ងរ។

បច្ចុប្បន្ន អ៊ីស្រាអែលត្រូវបានរាយការណ៍ថា កំពុងគ្រប់គ្រងប្រហែល ៧០% នៃផ្ទៃដីតំបន់ហ្គាហ្សា។ ចាប់តាំងពីខែតុលា ឆ្នាំ២០២៣មក សង្គ្រាមរបស់អ៊ីស្រាអែលនៅតំបន់ហ្គាហ្សា បានបណ្តាលឱ្យជនជាតិប៉ាឡេស្ទីនស្លាប់ជាង ៧៤.០០០នាក់ និងរងរបួសជាង ១៧៥.០០០នាក់ ដែលភាគច្រើនជាស្ត្រី និងកុមារ ព្រមទាំងបំផ្លាញហេដ្ឋារចនាសម្ព័ន្ធប្រមាណ ៩០% នៃតំបន់នេះ៕

Leave a Reply

Your email address will not be published. Required fields are marked *