គណបក្សប្រឆាំង Yisrael Beiteinu របស់អ៊ីស្រាអែល កាលពីថ្ងៃទី១៩ ខែវិច្ឆិកា បានដាក់សេចក្តីព្រាងច្បាប់ទៅកាន់សភា ដើម្បីកំណត់អាណត្តិនាយករដ្ឋមន្ត្រីឱ្យនៅត្រឹម ៨ ឆ្នាំ និងហាមឃាត់សមាជិកសភាដែលត្រូវបានចោទប្រកាន់ពីបទល្មើសធ្ងន់ធ្ងរ មិនឱ្យទទួលភារកិច្ចបង្កើតរដ្ឋាភិបាល។
សារព័ត៌មានAnadolu Agency។
សេចក្តីព្រាងច្បាប់នេះមានគោលបំណងទប់ស្កាត់ការប្រមូលផ្តុំអំណាចនៅលើមនុស្សតែម្នាក់ក្នុងរយៈពេលយូរ និងពង្រឹងការផ្លាស់ប្តូរអំណាច។ ប្រសិនបើច្បាប់នេះត្រូវបានអនុម័ត វាអាចប៉ះពាល់ដល់អនាគតនយោបាយរបស់លោក បេនចាមីន នេតាន់យ៉ាហ៊ូ ដែលបានកាន់តំណែងនាយករដ្ឋមន្ត្រីសរុបជាង ១៩ ឆ្នាំ និងកំពុងប្រឈមនឹងសំណុំរឿងពុករលួយពាក់ព័ន្ធនឹងការសូកប៉ាន់ ការក្លែងបន្លំ និងការរំលោភលើទំនុកចិត្ត ដែលលោកបានបដិសេធការចោទប្រកាន់ទាំងនេះ។
អ្នកដាក់សំណើបានលើកឡើងថា នាយករដ្ឋមន្ត្រីមិនមែនជាម្ចាស់ប្រទេសទេ ហើយផលប្រយោជន៍សាធារណៈត្រូវតែមានអាទិភាពជាងផលប្រយោជន៍ផ្ទាល់ខ្លួន។
ទោះជាយ៉ាងណា សេចក្តីព្រាងច្បាប់នេះមិនទាន់កំណត់កាលបរិច្ឆេទបោះឆ្នោតអនុម័តជាបឋមនៅឡើយទេ។ ប្រសិនបើឆ្លងកាត់ដំណាក់កាលដំបូង វានៅតែត្រូវឆ្លងកាត់ការអានចំនួន ៣ លើកទៀត មុននឹងក្លាយជាច្បាប់។
គួរបញ្ជាក់ថា ក្រោយការបោះឆ្នោតកាលពីខែតុលា ក្រុមគណបក្សប្រឆាំងលោកនេតាន់យ៉ាហ៊ូទទួលបាន ៦៧ អាសនៈ ក្នុងចំណោម ១២០ អាសនៈនៅក្នុងសភា ខណៈក្រុមគាំទ្រលោកទទួលបាន ៥៣ អាសនៈ៕

