ទីក្រុងទូប៉ាន់ស៊ីរ៉េតា (Tupancireta) ក្នុងរដ្ឋ Rio Grande do Sul ភាគខាងត្បូងប្រទេសប្រេស៊ីល បានរងការខូចខាតយ៉ាងធ្ងន់ធ្ងរ បន្ទាប់ពីព្យុះកំណាចមួយបានវាយប្រហារ បណ្តាលឱ្យមនុស្សយ៉ាងហោចណាស់៣នាក់ស្លាប់ និងអគាររាប់ពាន់ខ្នងរងការខូចខាត។
សារព័ត៌មានReuter។
តាមវិទ្យាស្ថានឧតុនិយមជាតិប្រេស៊ីល ព្យុះនេះបានកើតឡើងនៅព្រឹកថ្ងៃសុក្រ ដោយមានភ្លៀងធ្លាក់ខ្លាំង និងខ្យល់បក់ក្នុងល្បឿនរហូតដល់ ១១៤ គីឡូម៉ែត្រក្នុងមួយម៉ោង។ អាជ្ញាធរបានបញ្ជាក់ថា វាជាព្យុះផ្គររន្ទះប្រភេទ Supercell ដែលមានកម្លាំងខ្លាំង និងកម្រកើតមាន។
អាជ្ញាធរការពារជនស៊ីវិលបានឱ្យដឹងថា ផ្ទះយ៉ាងហោចណាស់ ៥.០០០ខ្នងបានរងការខូចខាត ខណៈអាជ្ញាធរកំពុងស៊ើបអង្កេតករណីអ្នកស្លាប់ទី៤។
ក្រោយព្យុះ អ្នកពន្លត់អគ្គិភ័យក៏បានចុះជួយសង្គ្រោះសត្វដែលជាប់នៅក្នុងមណ្ឌលសត្វរបស់ក្រុង ដោយនាំយកចំណីអាហារ និងទឹកទៅផ្គត់ផ្គង់ផងដែរ៕

