មានមនុស្សរាប់សិបនាក់រងរបួស បន្ទាប់ពីរថភ្លើងពីរគ្រឿងបានបុកគ្នានៅទីក្រុង Pezinok ប្រទេសស្លូវ៉ាគី នៅល្ងាចថ្ងៃអាទិត្យ កាលពីថ្ងៃទី 9 ខែវិច្ឆិកា។ ការស៊ើបអង្កេតបឋមបង្ហាញថា រថភ្លើងមួយគ្រឿងបានបើកបរឆ្លងកាត់សញ្ញាភ្លើងក្រហម មុននឹងបុកចូលខាងក្រោយរថភ្លើងមួយទៀត។
ប្រភពពីសារព័ត៌មានMetro កាលពីថ្ងៃទី 10 ខែវិច្ឆិកា ឆ្នាំ 2025។
រដ្ឋមន្ត្រីក្រសួងមហាផ្ទៃស្លូវ៉ាគី លោក Matus Sutaj Estok បានបញ្ជាក់ថា មានមនុស្សចំនួន ១១ នាក់ត្រូវបានបញ្ជូនទៅមន្ទីរពេទ្យ ខណៈដែលអ្នកដំណើរជាង ៤០ នាក់ទៀតរងរបួសស្រាល។ គាត់បានបន្ថែមថា គ្មានការស្លាប់ណាមួយត្រូវបានរាយការណ៍ឡើយ។
គ្រោះថ្នាក់នេះបានកើតឡើងនៅម៉ោងប្រហែល ៧:៣០ យប់ នៅតំបន់ជិតទីក្រុង Pezinok ក្នុងតំបន់ Bratislava។ ពេលនោះមានអ្នកដំណើរប្រមាណ ៨០០ នាក់ ស្ថិតនៅលើរថភ្លើង ដែលភាគច្រើនជានិស្សិត។
ប៉ូលីសស្លូវ៉ាគីបានប្រកាសតាមហ្វេសប៊ុកថា “យោងតាមព័ត៌មានបឋម មិនមានការបុកគ្នាដោយផ្ទាល់រវាងរថភ្លើងទាំងពីរទេ ហើយក៏មិនមានការធ្លាក់រថភ្លើងផងដែរ”។ ក្រុមសង្គ្រោះបន្ទាន់ និងប៉ូលីសបានឆ្លើយតបយ៉ាងឆាប់រហ័ស ដើម្បីជួយសង្គ្រោះអ្នករងរបួស និងនាំពួកគេទៅមន្ទីរពេទ្យ។
អ្នកនាំពាក្យមន្ទីរពេទ្យសាកលវិទ្យាល័យ Bratislava បាននិយាយថា មានអ្នកជំងឺពីរនាក់កំពុងធ្វើការវះកាត់ ហើយរំពឹងថាចំនួនអ្នកជំងឺនឹងកើនឡើង៕