ស្ត្រីម្នាក់បានរងរបួសនៅក្នុងការផ្ទុះមួយនៅក្នុងស្រុក Mezzeh នៃទីក្រុងដាម៉ាស នេះបើយោងតាមប្រព័ន្ធផ្សព្វផ្សាយរដ្ឋស៊ីរី។
ប្រភពពីសារព័ត៌មានAljazeera។
ទីភ្នាក់ងារសារព័ត៌មានអារ៉ាប់ស៊ីរី (SANA) បានរាយការណ៍ថា គ្រាប់រ៉ុក្កែតត្រូវបានបាញ់ទៅលើផ្ទះមួយនៅក្នុងរដ្ឋធានីស៊ីរីកាលពីយប់ថ្ងៃសុក្រ ដែលបណ្តាលឱ្យមានអ្នករបួស ក៏ដូចជាការខូចខាតសម្ភារៈផងដែរ។
ប្រព័ន្ធផ្សព្វផ្សាយរដ្ឋបាននិយាយថា ការវាយប្រហារនៅក្នុងសង្កាត់ Mezzeh 86 ភាគខាងលិចនៃទីក្រុងនេះ បណ្តាលមកពីជនវាយប្រហារដែលមិនស្គាល់អត្តសញ្ញាណ។
ប្រភពសន្តិសុខមួយបានប្រាប់ប៉ុស្តិ៍ទូរទស្សន៍រដ្ឋ Al-Ikhbariah TV ថា កងកម្លាំងសន្តិសុខបានបើកការស៊ើបអង្កេតលើឧប្បត្តិហេតុនេះ ហើយកំពុងតាមរកអ្នកដែលទទួលខុសត្រូវ។
ទីភ្នាក់ងារសារព័ត៌មាន SANA បានរាយការណ៍ថា ភាគីដែលនៅពីក្រោយការវាយប្រហារ និងអាវុធពិតប្រាកដ នៅតែមិនទាន់ដឹងនៅឡើយ។ ទោះជាយ៉ាងណាក៏ដោយ វាបានបន្ថែមថា រ៉ុក្កែតទាំងនោះត្រូវបានបាញ់ចេញពីឧបករណ៍បាញ់ចល័តមួយ៕