ក្រសួងការពារជាតិចិន កាលពីថ្ងៃអង្គារទី១៨ខែវិច្ឆិកា នេះបាននិយាយថាកងទ័ពជើងទឹកចិន និងវៀតណាមនឹងធ្វើការល្បាតរួមគ្នារយៈពេលពីរថ្ងៃនៅក្នុងឈូងសមុទ្រប៉ីប៊ូ។
ប្រភពពីសារព័ត៌មានReuters។
កាសែត Global Times ដែលគ្រប់គ្រងដោយរដ្ឋបានរាយការណ៍ដោយដកស្រង់សេចក្តីថ្លែងការណ៍របស់ក្រសួងថា កងនាវាមួយក្រុមមកពីកងទ័ពជើងទឹកចិន និងវៀតណាមនឹងអនុវត្តការល្បាតរួមគ្នាលើកទី 39 របស់ពួកគេនៅក្នុងឈូងសមុទ្រប៉ីប៊ូចាប់ពីថ្ងៃពុធដល់ថ្ងៃព្រហស្បតិ៍។
ឈូងសមុទ្រប៉ីប៊ូ ដែលត្រូវបានគេស្គាល់ផងដែរថាជាឈូងសមុទ្រតុងកឹង គឺជាផ្នែកពាក់កណ្តាលបិទជិតនៃសមុទ្រចិនខាងត្បូង ដែលមានព្រំប្រទល់ជាប់នឹងប្រទេសវៀតណាមនិងចិន។
ការល្បាតនេះកំពុងត្រូវបានធ្វើឡើងក្រោមកិច្ចព្រមព្រៀង និងយន្តការសម្របសម្រួលដែលមានស្រាប់រវាងយោធាទាំងពីរ។
ក្រសួងបាននិយាយថា “នេះនឹងពង្រឹងបន្ថែមទៀតនូវកិច្ចសហប្រតិបត្តិការជាក់ស្តែងរវាងយោធាទាំងពីរ និងបង្កើនសមត្ថភាពរបស់ពួកគេក្នុងការរួមគ្នាការពារសន្តិសុខនៃដែនទឹកពាក់ព័ន្ធ”។
គួររំលឹកថា នៅក្នុងខែមេសា ឆ្នាំនេះ កងទ័ពជើងទឹកនៃប្រទេសទាំងពីរក៏បានធ្វើការល្បាតរួមគ្នារយៈពេលមួយសប្តាហ៍នៅក្នុងឈូងសមុទ្រតុងកឹងផងដែរ៕