ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានបង្ហើបកាលពីថ្ងៃពុធទី២៦ខែវិច្ឆិកា អំពីគម្រោងសាងសង់រោងចក្រថាមពលនុយក្លេអ៊ែរដំបូងរបស់ប្រទេសកៀហ្ស៊ីស៊ីស្ថាន ក្រោមកិច្ចសហការទំនាក់ទំនងថាមពលរវាងម៉ូស្គូនិងប៊ីសខេក។
ប្រភពពីសារព័ត៌មានAl Jazeera។
ការប្រកាសនេះត្រូវបានធ្វើឡើងក្នុងអំឡុងពេលជួបជាមួយសមភាគីកៀហ្ស៊ីស៊ីស្ថាន លោក សាឌីរ ចាប៉ារ៉ូវ នៅរាជធានីប៊ីសខេក។ លោក ពូទីន បាននិយាយថា បច្ចេកវិទ្យារ៉េអាក់ទ័រម៉ូឌុលតូចទំនើប (SMR) អាចនឹងត្រូវបានយកមកប្រើក្នុងរោងចក្រថាមពលនុយក្លេអ៊ែរថ្មី ដែលកំពុងសិក្សារុករកលទ្ធភាពសាងសង់។
លោកបានលើកឡើងថា ក្រុមហ៊ុន Rosatom របស់រុស្ស៊ី កំពុងអនុវត្តគម្រោងធំសម្រាប់ស្តារឡើងវិញតំបន់រ៉ែអ៊ុយរ៉ាញ៉ូមនៅកៀហ្ស៊ីស៊ីស្ថាន បន្ទាប់ពីបោះបង់ចោលអស់រយៈពេលជាច្រើនឆ្នាំ។ ការសាងសង់រោងចក្រថាមពលនុយក្លេអ៊ែរដំបូងនេះ ត្រូវបានអះអាងថា នឹងបំពេញតាមស្ដង់ដារសុវត្ថិភាព និងបរិស្ថានដ៏តឹងរ៉ឹងបំផុត។
ក្រៅពីនេះ មេដឹកនាំរុស្ស៊ីក៏បានប្រកាសអំពីគម្រោងថាមពលបៃតងទៀតផងដែរ។ រួមមានរោងចក្រថាមពលពន្លឺព្រះអាទិត្យទំហំធំមួយ នៅតំបន់ Issyk-Kul ភាគខាងកើតកៀហ្ស៊ីស៊ីស្ថាន ហើយក្នុងភាគខាងជើង ប្រទេសនឹងទទួលបានរោងចក្រថាមពលកំដៅ និងថាមពលរួមបញ្ចូលគ្នាទំនើបថ្មីមួយ។
ការសហការនេះត្រូវបានមើលឃើញថា ជាជំហានសំខាន់មួយក្នុងការកែលម្អសុវត្ថិភាពថាមពល និងបំពេញតំរូវការផ្គត់ផ្គង់អគ្គិសនីរបស់កៀហ្ស៊ីស៊ីស្ថាន៕