កាលពីថ្ងៃអាទិត្យទី៧ខែធ្នូ លោក អាឡាសាន សេឌូ (Alassane Seidou) រដ្ឋមន្ត្រីក្រសួងមហាផ្ទៃប្រទេសបេនីន បានថ្លែងនៅលើកញ្ចក់ទូរទស្សន៍ជាតិដោយជំរុញឱ្យប្រជាពលរដ្ឋបន្តសកម្មភាពប្រចាំថ្ងៃរបស់ពួកគេ។
ប្រភពពីសារព័ត៌មានAANews។
មុននេះ រដ្ឋមន្ត្រីក្រសួងហិរញ្ញវត្ថុ រ៉ូម៉ូអាល់ វ៉ាដានី (Romuald Wadagni) បានប្រាប់សារព័ត៌មាន Jeune Afrique ថា ស្ថានភាពស្ថិតនៅក្រោមការគ្រប់គ្រង។
លោក Wadagni បាននិយាយថាយើងកំពុងដោះស្រាយស្ថានការណ៍ ប៉ុន្តែវាមិនទាន់ចប់ទេ។
យ៉ាងណាមិញ ក្រុមទាហានបេនីនមួយក្រុមបានប្រាប់អ្នកផ្សាយព័ត៌មានរដ្ឋកាលពីថ្ងៃអាទិត្យថា ពួកគេបានដកប្រធានាធិបតី ប៉ាទ្រីស តាឡុន (Patrice Talon) ចេញពីអំណាច និងបានតែងតាំងលោកវរសេនីយ៍ឯក ប៉ាស្កាល់ ទីគ្រី (Pascal Tigri) ឱ្យដឹកនាំគណៈកម្មាធិការយោធាសម្រាប់ការកសាងឡើងវិញដែលទើបបង្កើតថ្មី។
ទាហានបានប្រកាសផ្អាករដ្ឋធម្មនុញ្ញ និងការរំលាយស្ថាប័ន និងគណបក្សនយោបាយទាំងអស់ ដោយនិយាយថា ពួកគេនឹងបិទព្រំដែនបេនីន។
ស្ថានទូតអាមេរិកបាននិយាយនៅក្នុងសេចក្តីថ្លែងការណ៍មួយថា ខ្លួនកំពុងតាមដានរបាយការណ៍នៃការបាញ់ប្រហារនៅក្នុងទីក្រុង កូតូណូ Cotonou និងរបាយការណ៍ដែលមិនទាន់បានបញ្ជាក់នៃរដ្ឋប្រហារយោធា។
ស្ថានទូតបានជំរុញឱ្យប្រជាជនជៀសវាងទីក្រុង Cotonou និងតំបន់ក្បែរបរិវេណប្រធានាធិបតី តាមដានប្រព័ន្ធផ្សព្វផ្សាយក្នុងស្រុក និងជៀសវាងហ្វូងមនុស្ស និងបាតុកម្ម។
ទន្ទឹមនឹងនេះ ស្ថានទូតរុស្ស៊ី នៅក្នុងសេចក្តីថ្លែងការណ៍ Telegram បានណែនាំពលរដ្ឋរបស់ខ្លួននៅក្នុងប្រទេសឱ្យ ស្នាក់នៅផ្ទះ និងអនុវត្តតាមការប្រុងប្រយ័ត្នជាមូលដ្ឋានរហូតដល់ស្ថានភាពនៅទីក្រុង Cotonou កាន់សុវត្ថិភាព។
ស្ថានទូតបារាំងប្រចាំប្រទេសបេនីន ក៏បាននិយាយនៅក្នុងសេចក្តីថ្លែងការណ៍មួយថា ការបាញ់ប្រហារត្រូវបានរាយការណ៍នៅ ជំរំ ហ្គេសូ Camp Guezo ជិតលំនៅដ្ឋានប្រធានាធិបតី។
ស្ថានទូតបានជំរុញឱ្យពលរដ្ឋរបស់ខ្លួនស្នាក់នៅផ្ទះរហូតដល់មានការជូនដំណឹងបន្ថែមជាវិធានការសន្តិសុខ៕