បេសកជនពិសេសសហរដ្ឋអាមេរិក លោក Steve Witkoff បានអះអាងថា ប្រទេសរុស្ស៊ីនៅតែប្តេជ្ញាចង់បានសន្តិភាពជាមួយអ៊ុយក្រែន បន្ទាប់ពីកិច្ចប្រជុំជាមួយជំនួយការប្រធានាធិបតីរុស្ស៊ី លោក Kirill Dmitriev នៅរដ្ឋផ្លរីដា។
ប្រភពពីសារព័ត៌មានAnadolu Agency នៅថ្ងៃទី ២២ ខែធ្នូ ឆ្នាំ ២០២៥។
ក្នុងសេចក្តីថ្លែងការណ៍លើបណ្តាញសង្គម X លោក Witkoff បានឱ្យដឹងថា កិច្ចប្រជុំរយៈពេលពីរថ្ងៃនោះ មានលក្ខណៈប្រកបដោយភាពស្ថាបនានិងមានគោលបំណងជំរុញផែនការសន្តិភាពរបស់ប្រធានាធិបតីអាមេរិក លោក Donald Trump ស្តីពីវិបត្តិអ៊ុយក្រែន។ លោកបានបញ្ជាក់ថា ទីក្រុងមូស្គូឱ្យតម្លៃខ្ពស់ចំពោះតួនាទី និងការគាំទ្ររបស់សហរដ្ឋអាមេរិក ក្នុងការដោះស្រាយជម្លោះនិងស្តារឡើងវិញនូវសន្តិសុខសកល។
កិច្ចប្រជុំទាំងនេះគឺជាផ្នែកមួយនៃដំណើរការចរចាបន្តបន្ទាប់ ចាប់តាំងពីខែវិច្ឆិកា ដើម្បីស្វែងរកសន្តិភាព សម្រាប់បញ្ចប់សង្គ្រាមរវាងរុស្ស៊ី និងអ៊ុយក្រែន ដែលបានអូសបន្លាយជិតបួនឆ្នាំមកនេះ៕