ប្រធានាធិបតីសហរដ្ឋអាមេរិក លោក ដូណាល់ ត្រាំ បានប្រកាសថា សហរដ្ឋអាមេរិកនឹងរក្សាប្រេង និងកប៉ាល់ដែលបានរឹបអូសនៅឯឆ្នេរសមុទ្រវេណេស៊ុយអេឡា ដោយអាចនឹងពិចារណាលក់ រក្សាទុក ឬប្រើប្រាស់ក្នុងតំបន់បម្រុងយុទ្ធសាស្ត្រ។ លោកបានថ្លែងដូច្នេះនៅរដ្ឋផ្លរីដា ខណៈអាមេរិកបន្តពង្រឹងវិធានការត្រួតពិនិត្យនាវាដឹកប្រេងក្នុងតំបន់ការ៉ាប៊ីន។
ប្រភពពីសារព័ត៌មានAnadolu Agency នៅថ្ងៃទី២៣ខែធ្នូ។
លោក Trump បានបញ្ជាក់ថា ការបិទផ្លូវនាវាដឹកប្រេងទៅមកវេណេស៊ុយអេឡា មានគោលបំណងទប់ស្កាត់ការជួញដូរគ្រឿងញៀន ដោយអះអាងថា ការលួចនាំគ្រឿងញៀនតាមសមុទ្រចូលអាមេរិកត្រូវបានកាត់បន្ថយជាង 96 ភាគរយ។ លោកក៏បានព្រមានថា វិធានការដូចគ្នានឹងត្រូវអនុវត្តលើផ្លូវគោកផងដែរ។
ក្នុងការអត្ថាធិប្បាយដ៏តឹងរ៉ឹង លោក Trump បានចោទប្រកាន់រដ្ឋាភិបាលវេណេស៊ុយអេឡាថា បានបញ្ជូនឧក្រិដ្ឋជន និងអ្នកជួញដូរគ្រឿងញៀនចូលសហរដ្ឋអាមេរិក ខណៈលោកក៏បានព្រមានប្រធានាធិបតីវេណេស៊ុយអេឡា លោក Nicolas Maduro និងប្រធានាធិបតីកូឡុំប៊ី លោក Gustavo Petro ឱ្យប្រុងប្រយ័ត្នចំពោះវិធានការរឹងមាំរបស់អាមេរិក៕