(ត្បូងឃ្មុំ)៖ ក្រុមអ្នកដឹកដំឡូងមី ចេញពីកម្ពុជា ទៅលក់នៅប្រទេសវៀតណាម ដោយប្រើរថយន្តប្រភេទ(វ៉េអង)បានអះអាងថា ខ្លួនដឹក១ជើងៗ បង់លុយឱ្យ”ស្ថានីយថ្លឹងរថយន្តថ្នល់ទទឹង”នៅស្រុកត្បូងឃ្មុំ ខេត្តត្បូងឃ្មុំ អស់ចាប់ពី១០ម៉ឺនរៀល ទៅ១២ម៉ឺនរៀលក្នុង១ជើងជាកំហិត.!!។
ក្នុងនោះ បើពួកខ្លួនបើកឆ្លងកាត់តាមផ្លូវជាតិលេខ៧១C ក៏ត្រូវបង់លុយឱ្យស្ថានីយថ្លឹងរថយន្ត ត្រង់ចំណុចឃុំឈូក ស្រុកក្រូចឆ្មារ ខេត្តត្បូងឃ្មុំ អស់ចាប់ពី១០ម៉ឺនរៀល ទៅ១២ម៉ឺនរៀលក្នុង១ជើងដូចគ្នាផងដែរ..!។
*ករណីនេះលោកប្រធានមន្ទីរ
ជំរុញឱ្យទៅសួរ ប្រធានស្ថានីយថ្លឹងរថយន្ត
ខណៈលោកប្រធានស្ថានីយ៍ថ្លឹងរថយន្ត ចុចបិទទូរស័ព្ទ.!!។
*ទាក់ទិនរឿងនេះតៃកុងរថយន្ត(វ៉េអង)បានបញ្ជាក់ថា ជារៀងរាល់លើកពួកខ្លួនដឹកដំឡូងមី ចេញពីខេត្តកំពង់ធំ.កំពង់ចាម និងតាមបណ្ដាខេត្តមួយចំនួនទៀត ដោយត្រូវឆ្លងដែន យកទៅលក់ឱ្យឈ្មួញវៀតណាម តាមច្រកទ្វារព្រំដែននានា ក្នុងភូមិសាស្ត្រខេត្តត្បូងឃ្មុំ.!។
ក្នុងនោះ ពេលខ្លះពួកគាត់ បើកតាមផ្លូវជាតិលេខ៧ ទម្រាំដល់កន្លែងលក់ គឺត្រូវបង់លុយឱ្យមន្ត្រី នៃស្ថានីយថ្លឹងរថយន្តជាបន្តបន្ទាប់!។
ជាក់ស្តែង ពេលបើកមកដល់ចំណុច”ស្ថានីយថ្លឹងរថយន្តថ្នល់ទទឹង” នៅស្រុកត្បូងឃ្មុំ គឺពួកខ្លួនត្រូវបង់លុយឱ្យមន្ត្រីនៅស្ថានីយថ្លឹងរថយន្តមួយនេះ អស់ចំនួន១២ម៉ឺនរៀល ក្នុង១ជើងជាកំហិត.!!។
ជាមួយគ្នានេះ នៅពេលពួកគាត់ដឹកជញ្ជូនដំឡូងមី តាមផ្លូវជាតិលេខ៧១C ទិសដៅពីស្រុកចំការលើ ឆ្ពោះមកឆ្លងកាត់ ស្ពានស្ទឹងត្រង់។
ក៏ត្រូវបង់លុយឱ្យស្ថានីយថ្លឹងរថយន្ត ត្រង់ចំណុចឃុំឈូក ស្រុកក្រូចឆ្មារ អស់ចាប់ពី១០ម៉ឺនរៀល ទៅ១២ម៉ឺនរៀលក្នុង១ជើងផងដែរ ជាថ្នូរនឹងអនុញ្ញាតឱ្យរថយន្តខ្លួន ផ្ទុកដំឡូងមី ចាប់ពី៥០តោន.ទៅ៧០តោនសាច់.!។
ពោលគឺ រាល់លើកនៅពេលរត់ការបង់លុយហើយនោះ ពួកគាត់គ្រាន់តែបើករថយន្តចូលជញ្ជីង ដើម្បីបង្គ្រប់កិច្ច រួចក៏បន្តដំណើរទៅមុខជាធម្មតា…!!។
និយាយជារួម គោលការច្បាប់ រថយន្ត(វ៉េអង)គេតម្រូវឱ្យផ្ទុកត្រឹមតែ៤៥តោនសាច់ប៉ុណ្ណោះ!។
ខណៈសំបករថយន្ត ទម្ងន់២០តោនទៀត អញ្ចឹងបូកទាំងសាច់ដំឡូង រួមនិងសំបករថយន្ត.គឺទម្ងន់សរុបដែលអាច បើកបរលើដងផ្លូវបានស្មើនិង៦៥តោន!។
*ផ្ទុយទៅវិញ ក្រុមរថយន្ត(វ៉េអង)រាប់សិបគ្រឿងក្នុង១ថ្ងៃៗ ដែលមានទម្ងន់សរុបទាំងសំបករថយន្ត រួមនិងដំឡូងមី ចាប់ពី៧០តោន.ទៅ៩០តោន!។
បែរជា អាចចរាចរណ៍លើដងផ្លូវបានយ៉ាងពេញបន្ទុក ក្រោមហេតុផលលុយក្រោមតុ.ចាប់ពី១០ម៉ឺន ទៅ១២ម៉ឺនរៀល សម្រាប់ជញ្ជីង១កន្លែង!។
*ដើម្បីឱ្យមានចម្លើយទាំងសងខាងនៅរសៀលថ្ងៃទី២៣.១២.២០២៥”ដើមរាំង”បានសុំការបំភ្លឺពីលោក គី ដាណារិទ្ធ ប្រធានមន្ទីរសាធារណការ និងដឹកជញ្ជូន ខេត្តត្បូងឃ្មុំដោយលោកថ្លែងថា ពាក់ព័ន្ធរឿងយកលុយអីទាំងនុង លោកពុំទាន់ទទួលបានព័ត៌មាននោះទេ!។
ក្នុងនោះលោក គី ដាណារិទ្ធ ក៏បានរុញឱ្យទៅសួរលោក គង់ សុភាព ប្រធានស្ថានីយថ្លឹងរថយន្ត ជំនួសវិញទើបច្បាស់…!។
*រីឯលោក គង់ សុភាព អនុប្រធានមន្ទីរសាធារណការ និងដឹកជញ្ជូន ខេត្តត្បូងឃ្មុំនិងជាប្រធានស្ថានីយថ្លឹងរថយន្តថ្នល់ទទឹង ទទួលបន្ទុកស្ថានីយថ្លឹងរថយន្ត ឃុំឈូក ស្រុកក្រូចឆ្មារ មិនអាចសុំការបំភ្លឺបានទេ ដោយទូរស័ព្ទចូលហើយលោកចុចបិទ.!។
*ទោះជាយ៉ាងណាក៏ដោយ ប្រជាកសិករជាពិសេសអាជីវករ ដែលតែងតែរកស៊ីដឹកដំឡូងមី ទៅលក់នៅប្រទេសវៀតណាម សុំស្នើយ៉ាងទទូចដល់ ឯកឧត្តមកិត្តិនីតិកោសលបណ្ឌិត ឱម យ៉ិនទៀង ទេសរដ្ឋមន្ត្រី ប្រធានអង្គភាពប្រឆាំងអំពើពុករលួយ
ឯកឧត្តម សេង ឈួន រដ្ឋលេខាធិការក្រសួងសាធារណការ និងដឹកជញ្ជូន
និងជាប្រធានគណៈកម្មាធិការសម្របសម្រួលអចិន្ត្រៃយ៍ នៃគណៈកម្មាធិការដឹកនាំការត្រួតពិនិត្យយានយន្តដឹកជញ្ជូន លើសទម្ងន់កម្រិតកំណត់ ឯកឧត្តម ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន
ជាពិសេសសម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា មេត្តាបើកការស្រាវជ្រាវ និងចាត់វិធានការវះកាត់ ទៅលើមន្ត្រីពាក់ព័ន្ធ ដែលបានកំណត់យកលុយនិងទទួលសំណូក ពីរថយន្តដឹកលើសទម្ងន់!!។
ដើម្បីលើកស្ទួយតម្លៃដំឡូងមីរបស់កសិករខ្មែរយើង និងថែរក្សាផ្លូវថ្នល់ឱ្យបានយូរអង្វែង ជៀសវាងការដឹកជញ្ជូនបំផ្លាញផ្លូវ នាំឱ្យខាតថវិកាជាតិ លើការចំណាយជួសជុល ឬសាងសង់ផ្លូវឡើងវិញ៕
