(ភ្នំពេញ)៖ កាលពីថ្ងៃទី២៨ ខែធ្នូ ឆ្នាំ២០២៥ ឯកឧត្តម ឃួន ផុនរតនៈ ឯកអគ្គរាជទូតវិសាមញ្ញ និងពេញសមត្ថភាព នៃព្រះរាជាណាចក្រកម្ពុជាប្រចាំសាធារណរដ្ឋកូរ៉េ និងលោកជំទាវ ម៉ៅ នរនាថ បាននាំយកថវិកាចំនួន ១០០,១៦៨,០០០រៀល (មួយរយលានដប់ប្រាំមួយម៉ឺនប្រាំបីពាន់រៀល) និងសារ៉ុងចំនួន ២,១៦៨ ឧបត្ថម្ភជូនមន្ទីរពេទ្យគន្ធបុប្ផា ដើម្បីគាំទ្រដល់បេសកកម្មសសង្គ្រោះជីវិតទារក និងកុមារ ព្រមទាំងស្ត្រីមានផ្ទៃពោះនៅកម្ពុជា។
ក្នុងពិធីប្រគល់ និងទទួលអំណោយនេះ ក៏មានការអញ្ជើញចូលរួមជាកិត្តិយសពីសំណាក់ ឯកឧត្តម ម៉ៅ ធនិន អភិបាលនៃគណៈអភិបាលខេត្តកំពត និងលោកជំទាវ ហ៊ុន ចាន់ធី ព្រមទាំងសហការី ក្នុងស្មារតីសប្បុរសធម៌ និងការចែករំលែកយ៉ាងជ្រាលជ្រៅ។
បន្ទាប់ពីពិធីប្រគល់ និងទទួលអំណោយ ឯកឧត្តម ឃួន ផុនរតនៈ និងលោកជំទាវ រួមជាមួយ ឯកឧត្តម ម៉ៅ ធនិន និងលោកជំទាវ បានអញ្ជើញចុះសួរសុខទុក្ខកុមារដែលកំពុងសម្រាកព្យាបាលដោយផ្ទាល់តាមគ្រែ ដើម្បីសំណេះសំណាល និងផ្តល់កម្លាំងចិត្តដល់ក្រុមគ្រួសារ និងកុមារៗ។
ក្នុងឱកាសនោះ ឯកឧត្តម ឃួន ផុនរតនៈ និងលោកជំទាវ ក៏បានចែកជូនសារ៉ុង និងថវិកាមួយចំនួន ដល់អាណាព្យាបាលកុមារដែលកំពុងសម្រាកព្យាបាលផងដែរ។
ក្នុងឱកាសនោះដែរ ឯកឧត្តម ឃួន ផុនរតនៈ បានលើកឡើងថា ការចូលរួមចំណែកបរិច្ចាគថវិកានាពេលនេះ គឺជាការបង្ហាញនូវស្មារតីសាមគ្គីភាព និងការចូលរួមចំណែកគាំទ្រដល់ដំណើរការរបស់មន្ទីរពេទ្យគន្ធបុប្ផា ដែលជាស្ថាប័នដ៏សំខាន់ក្នុងការផ្តល់ក្តីសង្ឃឹម និងសង្គ្រោះជីវិតទារក និងកុមារកុមារកម្ពុជាព្រមទាំងស្ត្រីមានផ្ទៃពោះរាប់លាននាក់ក្នុងមួយឆ្នាំៗ។
ឯកឧត្តមបានបង្ហាញសេចក្តីសង្ឃឹមថា អំណោយទាំងនេះ នឹងរួមចំណែកលើកកម្ពស់សុខុមាលភាពទារក និងកុមារ ដែលជាទំពាំងស្នងឫស្សីដ៏មានតម្លៃរបស់ជាតិ។
ហើយសកម្មភាពមនុស្សធម៌នេះ បានឆ្លុះបញ្ចាំងពីការយកចិត្តទុកដាក់ខ្ពស់របស់ថ្នាក់ដឹកនាំ ចំពោះវិស័យសុខាភិបាលសាធារណៈ ជាពិសេស ការរួមចំណែកក្នុងការរក្សានិរន្តរភាព នៃការព្យាបាលដោយឥតគិតថ្លៃ សម្រាប់កុមារកម្ពុជាគ្រប់រូប។
សូមបញ្ជាក់ថា មន្ទីរពេទ្យគន្ធបុប្ផាបានបម្រើសេវាពិនិត្យ ព្យាបាល និងសង្គ្រោះជីវិតកុមាររាប់ម៉ឺននាក់ដោយឥតគិតថ្លៃ ជាមួយនឹងការចំណាយថវិកាប្រមាណពី ៤៥លាន ទៅ៥០លានដុល្លារអាម៉េរិកក្នុងមួយឆ្នាំៗ។
ថវិកាចំណាយទាំងនេះបានមកពីការចូលរួមឧបត្ថម្ភពីសំណាក់មូលនិធិគន្ធបុប្ផាស៊្វីស ឬមូលនិធិគន្ធបុប្ផា Dr. Beat Richner, រាជរដ្ឋាភិបាលកម្ពុជា, និងមូលនិធិគន្ធបុប្ផាកម្ពុជា ដែលទទួលបានពីការចូលរួមបរិច្ចាគ នៃសប្បុរសជនទាំងក្នុងវិស័យឯកជន និងវិស័យសាធារណៈ រួមគ្នាជាមួយរាជរដ្ឋាភិបាល ដើម្បីនាំមកនូវស្នាមញញឹមដល់កុមារ ក្នុងស្មារតីជួយគ្នាទៅវិញទៅមក ក្រោមពាក្យស្លោក “ខ្មែរជួយខ្មែរ និងដើម្បីលើកកម្ពស់សុខុមាលភាពរបស់កុមាររាប់លាននាក់នៅកម្ពុជា ដែលជាអាទិភាពមួយនៃក្រប ខ័ណ្ឌគោលនយោបាយជាតិគាំពារសង្គម របស់រាជរដ្ឋាភិបាល ក្រោមការដឹកនាំរបស់សម្តេចធិបតី ហ៊ុន ម៉ាណែត ជាប្រមុខដឹកនាំ៕