ការវិលត្រឡប់មកប្រទេសវិញរបស់លោក Tarique Rahman កូនប្រុសអតីតនាយករដ្ឋមន្ត្រី Khaleda Zia បន្ទាប់ពីនិរទេសខ្លួនរយៈពេល ១៧ ឆ្នាំ បានធ្វើឱ្យនយោបាយបង់ក្លាដែសឈានចូលដំណាក់កាលថ្មី ខណៈប្រទេសកំពុងត្រៀមការបោះឆ្នោតនៅខែកុម្ភៈ ឆ្នាំ២០២៦។ ការស្លាប់របស់ Khaleda Zia នៅចុងឆ្នាំ ២០២៥ បានបញ្ចប់យុគសម័យមួយ និងធ្វើឱ្យ Rahman ក្លាយជាមេដឹកនាំពេញលេញនៃគណបក្សជាតិនិយមបង់ក្លាដែស (BNP)។
ប្រភពពីសារព័ត៌មានAl Jazeera នៅថ្ងៃទី៨ខែមករាឆ្នាំ២០២៦។
នៅក្នុងបរិបទនយោបាយដែលមិនមានស្ថិរភាព បន្ទាប់ពីការដួលរលំនៃរដ្ឋាភិបាល Awami League និងការភៀសខ្លួនរបស់ Sheikh Hasina លោក Rahman ត្រូវបានមនុស្សជាច្រើនមើលឃើញថា ជាជម្រើសថ្មីមួយសម្រាប់ការបោះឆ្នោត ដែលអាចបញ្ចប់ការគ្រប់គ្រងផ្តាច់ការរយៈពេលវែង។ សម្រាប់អ្នកបោះឆ្នោតជាច្រើន លោកតំណាងឱ្យការវិលត្រឡប់នៃការប្រកួតប្រជែងនយោបាយពិតប្រាកដ។
លោក Rahman កំពុងព្យាយាមបង្ហាញខ្លួនជារដ្ឋបុរស ដោយផ្តោតលើនីតិរដ្ឋ ឯកភាពជាតិ និងការការពារជនជាតិភាគតិច។ ទោះជាយ៉ាងណា អនាគតនយោបាយរបស់លោក និងការទទួលយកពីសង្គមបង់ក្លាដែស នឹងអាស្រ័យយ៉ាងខ្លាំងលើសមត្ថភាពរបស់លោកក្នុងការកែលម្អស្ថាប័នសំខាន់ៗ ដូចជា តុលាការ និងគណៈកម្មការបោះឆ្នោត៕