រដ្ឋអាជ្ញាពិសេសកូរ៉េខាងត្បូង នឹងស្នើសុំសាលក្រមផ្តន្ទាទោសធ្ងន់ធ្ងរ រហូតដល់ទោសប្រហារជីវិត លើអតីតប្រធានាធិបតី លោក យូន ស៊ុកយុល (Yoon Suk Yeol) ពីបទ មេខ្លោងនៃអំពើបះបោរ ពាក់ព័ន្ធនឹងការប្រកាសច្បាប់អាជ្ញាសឹកកាលពីឆ្នាំ២០២៤។
សារព័ត៌មាន Reuters។
ក្នុងសវនាការចុងក្រោយ នៅតុលាការកណ្តាលទីក្រុងសេអ៊ូល កាលពី(ថ្ងៃសុក្រទី៩ខែមករា) រដ្ឋអាជ្ញាបានចោទប្រកាន់លោក យូន និងអតីតរដ្ឋមន្ត្រីការពារជាតិ គីម យ៉ុងហ្យុន ថាបានរៀបចំផែនការតាំងពីខែតុលា ឆ្នាំ២០២៣ ដើម្បីព្យួររដ្ឋសភា និងចោទប្រកាន់គូប្រជែងនយោបាយថាជា កងកម្លាំងប្រឆាំងរដ្ឋ។
ពួកគេថែមទាំងបានបង្កើតលេស ដោយបង្កើនភាពតានតឹង ជាមួយកូរ៉េខាងជើង តាមរយៈប្រតិបត្តិការដ្រូនសម្ងាត់ទៀតផង។
លោក យូន បានបដិសេធរាល់ការចោទប្រកាន់ ដោយអះអាងថាការប្រកាសច្បាប់អាជ្ញាសឹក គឺជាអំណាចរបស់ប្រធានាធិបតី ដើម្បីដាស់តឿនអំពីការរាំងស្ទះរបស់បក្សប្រឆាំង។
ទោះបីជាច្បាប់កូរ៉េខាងត្បូង អនុញ្ញាតឱ្យមានទោសប្រហារជីវិត ចំពោះបទបះបោរក៏ដោយ ប៉ុន្តែប្រទេសនេះ មិនបានអនុវត្តការប្រហារជីវិតជាក់ស្តែងតាំងពីឆ្នាំ១៩៩៧៕