ប្រធានាធិបតីអ៊ុយក្រែន លោកVolodymyr Zelensky បានព្រមានថាការផ្គត់ផ្គង់ប្រព័ន្ធការពារដែនអាកាសរបស់ប្រទេសលោកនៅតែមិនគ្រប់គ្រាន់ ដោយសារប្រព័ន្ធមួយចំនួនខ្វះមីស៊ីលទោះបីជាបានទទួលកញ្ចប់ធំមួយពីសម្ព័ន្ធមិត្តក៏ដោយ។
ប្រភពពីសារព័ត៌មានBBC នៅថ្ងៃទី១៧ខែមករា។
ការអះអាងនេះកើតឡើង ខណៈរុស្ស៊ីបន្តវាយប្រហារយ៉ាងខ្លាំងលើហេដ្ឋារចនាសម្ព័ន្ធថាមពល បណ្តាលឲ្យប្រជាពលរដ្ឋរាប់ពាន់នាក់ខ្វះអគ្គិសនី និងកំដៅក្នុងរដូវរងាដ៏ត្រជាក់ខ្លាំង។ នៅទីក្រុង Kyiv សាលារៀននឹងបិទរហូតដល់ខែកុម្ភៈ ដោយសារកង្វះថាមពល និងសីតុណ្ហភាពធ្លាក់ដល់ -១៩ អង្សាសេ។
លោក Zelensky បានអំពាវនាវឲ្យសម្ព័ន្ធមិត្ត ដឹកជញ្ជូនមីស៊ីលឲ្យរហ័ស និងជាប្រចាំដោយបញ្ជាក់ថាការដឹកជញ្ជូនមិនមានន័យថាការវាយប្រហារនឹងបញ្ចប់ភ្លាមៗទេ។ លោកក៏បានរិះគន់ប្រទេសដែលស្តុកទុកគ្រាប់រំសេវ ខណៈអ៊ុយក្រែនកំពុងសង្គ្រាម និងត្រូវការយ៉ាងចាំបាច់៕