កាលពីថ្ងៃទី16 ខែមករា ឆ្នាំ2026 នាយករដ្ឋមន្ត្រីម៉ាឡេស៊ី លោក Anwar Ibrahim បានប្រកាសថា រដ្ឋាភិបាលបាន ផ្អាកជាបណ្តោះអាសន្នក្នុងការផ្គត់ផ្គង់សម្ភារៈយោធា និងប៉ូលីស ទាំងអស់ ដែលជាប់ពាក់ព័ន្ធនឹងការស៊ើបអង្កេតអំពើពុករលួយដ៏ធំមួយដែលកំពុងបន្តនៅក្នុងប្រទេស។
ប្រភពពីសារព័ត៌មានAnadolu Agency។
ការសម្រេចចិត្តនេះធ្វើឡើង បន្ទាប់ពីគណៈកម្មការប្រឆាំងអំពើពុករលួយម៉ាឡេស៊ី (MACC) បានចាប់ខ្លួន អតីតមេបញ្ជាការកងទ័ព និង ភរិយាពីរនាក់របស់គាត់ កាលពីថ្ងៃទី 7 ខែមករា ពាក់ព័ន្ធនឹងគម្រោងផ្គត់ផ្គង់សម្ភារៈយោធា។ អាជ្ញាធរបានរឹបអូសទ្រព្យសម្បត្តិមានតម្លៃប្រហែល 11.4 លានរីងហ្គីត (ប្រមាណ 2.8 លានដុល្លារ) ក្នុងអំឡុងប្រតិបត្តិការវាយឆ្មក់ជាច្រើនលើក។
លោក Anwar បានថ្លែងថា រដ្ឋាភិបាលនឹង ពិនិត្យ និងរៀបចំរចនាសម្ព័ន្ធឡើងវិញ ដំណើរការផ្គត់ផ្គង់ ដើម្បីបង្កើន តម្លាភាព អភិបាលកិច្ច និងការអនុលោមតាមច្បាប់។ លោកបានបញ្ជាក់ថា លោកកំពុងរង់ចាំរបាយការណ៍លម្អិតអំពីចន្លោះប្រហោង ឬចំណុចខ្សោយក្នុងប្រព័ន្ធបច្ចុប្បន្ន ដើម្បីធានាថាការកែទម្រង់នឹងមានប្រសិទ្ធភាពពេញលេញ៕